Bıyl elimizde túrli ádis-aıla arqyly bıýdjetten 360 mlrd teńge jymqyrylǵan

NUR-SULTAN. QazAqparat - Qarjy monıtorıngi komıtetinde «kóleńkeli» ekonomıkamen kúres boıynsha 2020 jylǵy 9 aıyndaǵy jumysy qorytyndylandy, dep habarlaıdy QazAqparat.

Memleket basshysynyń ekonomıkalyq tergeý qyzmetin qaıta baǵyttaý jónindegi tapsyrmasyn iske asyrý sheńberinde jedel-aldyn alý sharalarynyń kesheni uıymdastyryldy.

Prokýratýra jáne ulttyq qaýipsizdik organdarymen birlese otyryp, shot-faktýralardy jalǵan jazyp berý men aqsha qarajatyn qylmystyq jolmen qolma-qol aqshaǵa aınaldyrýmen kúreske baǵyttalǵan «STOP-OBNAL» jedel-aldyn alý sharasy júzege asyrylýda.

Taldaý arqyly jalǵan shot-faktýralardy jazyp berý men krımınaldyq qolma-qol aqshamen aınalysatyn 60-tan astam yqtımal qylmystyq top anyqtaldy.

Olar 1 200-den astam baqylanatyn kompanııa qurdy, olardyń qarjylyq aınalymy 2 trıllıon teńgeden asty. Sońǵy bes jylda alǵash ret qolma-qol aqshany alý deńgeıi 39% azaıǵanyn atap ótken jón.

Jalpy, uıymdasqan qylmystyq topty qurý jáne oǵan qatysý faktileri boıynsha 47 qylmystyq is qozǵaldy.

Sonymen birge, memlekettik satyp alý jáne memlekettik baǵdarlamalardy iske asyrý sheńberinde bıýdjet qarajatyn jymqyrý faktilerin anyqtaýǵa baǵyttalǵan «Qazyna» jedel-aldyn alý sharasy ótkilizýde.

Jyldyń basynan bıýdjettik jáne kvazımemlekettik qarajatty jymqyrý belgileri bar 200-den astam syzba anyqtaldy. Olar bıýdjetten 360 mlrd teńgeden astam qarajatty aýdarǵan.