Bıyl elimizde sapasyz ınternetke qatysty 5 myńnan astam shaǵym túsken
«Bıylǵy 1 sáýirdegi málimetke súıensek, Qazaqstandaǵy halyq sany 200 myńnan asatyn 1432 aýyl keń jolaqty mobıldi ınternetke qosylmaǵan. Bul resmı derek. Shynaıy jaǵdaıǵa toqtalsaq, ǵalamtordy atymen kórmegen eldi mekender sany budan áldeneshe ese kóp bolýy múmkin. 2020 jyly memleket Qazaqstan Respýblıkasy halqynyń 98,7%-yn ınternet jelisine keńjolaqty júıemen qamtamassyz etti degendi de el estidi. Basqasyn bylaı qoıǵanda, bas qalanyń biraz jerinde ınternet áýpirimdep áreń isteıdi», - dedi N. Sársenǵalıev Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsınniń atyna joldaǵan saýalynda.
Onyń aıtýynsha, ınternetsiz eldi mekenderde qıyndyqty ustazdar men oqýshylar sezinip otyr.
«2023 jyldyń 4 aıynyń ózinde qazaqstandyqtar sapasyz ınternetke qatysty 5 myńnan astam aryz-shaǵym túsirgen. Osy jerde zańdy saýal týady, sapasyz ınternetti usynǵan operatorlarǵa qansha aıppul salyndy? Tıisti mejege jetý úshin jaýapty mınıstrlik qandaı qareket qylyp jatyr? Atqarylǵan jumysty túgel joqqa shyǵarýdan aýlaqpyz, búgingi kúnge deıin 6290 aýyldyń 4974-ine keń jolaqty mobıldi ınternet tartylǵan. Al qalǵan myńnan astam eldi mekendegi halyqtyń quqyǵy shektelip qalǵan joq pa?», - dedi depýtat.
Osy rette ol tıisti usynystardy jarııalady. Birinshiden, sapasyz ınternet pen uıaly baılanyssyz otyrǵan aýyldardaǵy problemany sheshý úshin Úkimette arnaıy komıssııa qurýdy, onyń quramyna qoǵam belsendilerin, sala mamandaryn jáne depýtattardy qosýdy surady.
«Mınıstrliktiń múmkindikterin paıdalana otyryp, uıaly baılanys pen ınterneti joq aýyl-aımaqtardyń tizimin atyn atap turyp ashyq jarııalaý qajet. Internetsiz otyrǵan aýyl-aımaqtardyń turǵyndary ózi turyp jatqan eldi mekenge qashan, qaı kezde ǵalamtordyń qosylatynyn naqty bilýi kerek. Sondyqtan, mınıstrlik qoǵam aldynda jaýapkershilik alyp, qaı jerge, qashan sapaly ınternettiń jetetinin ashyq jarııalaýy qajet», - dedi depýtat.