Bıyl elimizde kúrdeli jaǵdaıda qalǵan 101 myń otbasy anyqtaldy
Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda Birjan Nurymbetov búginde Eńbek mınıstrligi birqatar mańyzdy jobany júzege asyryp jatqanyn aıtty. Olardyń ishindegi eń mańyzdysy – Qazaqstan halqynyń 100 paıyz, ıaǵnı 7 mln otbasy qamtylǵan «Otbasynyń áleýmettik kartasy». Osy áleýmettik karta árbir otbasy qandaı ómirlik jaǵdaıda ekenin, kúrdeli nemese daǵdarystyq ahýaldan shyǵarý boıynsha jumys algorıtmin kórsetedi.
«Áleýmettik kartalardy qalyptastyrǵannan keıin kúrdeli jáne daǵdarys jaǵdaıynda bolǵan 101 myń otbasy anyqtaldy. 12,7 myń adamdy jumysqa ornalastyrý, 68,8 myń azamatty emhanalarǵa tirkeý, 72,9 myń balany balabaqshalar men mektepterge tirkeý boıynsha sharalar qabyldandy. 1 451 otbasy kúrdeli jáne daǵdarys jaǵdaıynan shyǵaryldy», – dedi Birjan Nurymbetov.
Mıınstr atap ótken taǵy bir mańyzdy joba - «Qazaqstan azamatynyń áleýmettik ID» jobasy. Bul joba áleýmettik járdemaqy alýdyń ashyqtyǵyn, yńǵaılylyǵyn arttyrýǵa baǵyttalǵan. Áleýmettik ID bul ataýly áleýmettik kómek, qoǵamdyq kólikte jeńildikpen jol júrýdi tóleýdi, kópbalaly jáne tabysy az otbasylardyń balalaryna mektepterde tegin tamaqtandyrýdy kózdeıdi.
«Bul jobanyń pılottyq nusqasy Respýblıkanyń 9 óńirinde iske asyryldy. 102 myń ID-karta berildi, 88 myń tranzaktsııa júrgizildi. Bolashaqta biz bul jobany barlyq óńirlerde tolyǵymen qoldanýdy josparlap otyrmyz», – dedi ol.