Bıyl elimizde qansha kómir óndirildi

ASTANA. QazAqparat – Bıylǵy 7 aıda elimizde 61 mln 700 myń tonna kómir óndirildi. Bul týraly Indýstrııa jáne ınfraqurylymdyq damý vıtse-mınıstri Іlııas Ospanov aıtty, dep habarlaıdy QazAqparat tilshisi.

«Jylý berý kezeńiniń josparyna sáıkes, shamamen 9 mln 100 myń tonna kómir qajet (onyń ishinde kommýnaldyq salada - 2,4 mln tonna, halyqqa – 6,7 mln tonna kómir). Bıylǵy 7 aı ishinde 61 mln 700 myń tonna kómir óndirildi, onyń ishinde kommýnaldyq-turmystyq qajettilikter men halyqqa 3 mln 900 myńǵa jýyq tonna jóneltildi», - dedi І. Ospanov Úkimet otyrysynda.

Onyń aıtýynsha, áleýmettik kómirdiń shetke ketýin boldyrmaý maqsatynda mınıstrlik kómirdi avtomobıl kóligimen tasymaldaýdy shekteýge baǵyttalǵan aldyn alý sharalaryn qabyldady. Budan bólek, kómir óndirýge kelisimsharttary bar kómir óndirýshi kásiporyndar men olardyń úlestes saýda kompanııalaryna tasymaldaý quqyǵyn bere otyryp, kómir eksportyna aıryqsha quqyqty belgileý máselesi pysyqtalyp jatyr.

«Jergilikti atqarýshy organdar baqylaýshy organdarmen birlesip, jylý berý maýsymyna daıyndyqty kúsheıtýge múmkindik beretin birqatar is-sharalardy pysyqtaýy qajet», - dedi vıtse-mınıstr.