Bıyl elimizde 750 bazalyq ınternet stansasy salynady
Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın ortalyq kommýnıkatsııalar qyzmetinde ótken baspasóz máslıhatynda osyndaı málimet aıtty.
«Talshyqty optıka symdary boıynsha 1250 aýyldyq mekenge ınternet jetkizildi. 928 aýylǵa mobıldi ınternet tartyldy. Jalpy alǵanda, 5300 aýyldy mekende ınternet bar deýge bolady. Biraq olardyń ishinde áli 510 aýylda másele bar. Másele degenimiz, tek WhatsApp arqyly habarlama almasyp, jańalyqtar oqýǵa ǵana jaramdy ınternet tartylǵan. YouTube sııaqty resrýstardy padalanýǵa saı emes. Sondyqtan biz osy 510 aýyldy mekendi osy jyly qolǵa alyp, basqa satyǵa kóteremiz», - dedi vedomstvo basshysy.
Baǵdat Mýsın buǵan deıin halqynyń sany neǵurlym kóp aýyldardyń ınternetpen qamtylýyna kóp kóńil bólingen bolsa, endi shaǵyn aýyldarǵa da tıisti ınfraqurylym tartylatynyn aıtty.
«2021 jyly 750 bazalyq stansa jańadan salynyp, 550 stansa jańartylady. Sonyń ishinde 286 aýyldaǵy baılanys 3G, 4G standarttaryna aýystyrylady. 51 aýyldy mekende ınternet jelisi spýtnıktik transmıssııadan jerdegi optıkalyq ınfraqurylymǵa aıyrbasatalady. Turǵyn sany 250 adamnan aspaıtyn 292 aýylǵa ınternet jetkiziledi», - dedi mınıstr.
Eske salsaq, atalmysh sharada Baǵdat Mýsın vaktsınatsııa qashyqtan jazylýǵa múmkindik beretin eGov mobile qosymshasy týraly aıtqan bolatyn.
Sondaı-aq, mınıstr Saqbol qosymshasynyń jumys prıntsıpin túsingen bolatyn.