Bıyl elimizde 70 mektep pen balabaqsha paıdalanýǵa beriledi - mınıstr

ASTANA. QazAqparat - Bıyl elimizde 70 mektep pen balabaqsha paıdalanýǵa beriledi. Bul týraly búgin Úkimette «Nurly jol» memlekettik baǵdarlamasynyń 2017 jyldyń I jartyjyldyǵynda iske asyrylýynyń negizgi qorytyndysyn talqylaý barysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«2017 jyly Ulttyq qor qarajaty esebinen 109 mektepti, onyń ishinde 53 aýyspaly 56 jańa bilim ordasyn salý úshin 71,7 mlrd teńge kózdelgen. Jyl sońyna deıin 70 nysandy paıdalanýǵa berý josparlanyp otyr. Aǵymdaǵy jylǵy 1 shildedegi jaǵdaı boıynsha jergilikti bıýdjetke 30,4 mlrd teńge aýdarylyp, tolyq kólemde ıgerildi»,- dedi mınıstr.

Onyń aıtýynsha, qazirgi ýaqytta 1150 orynǵa arnalǵan 3 mektep Jambyl, Qaraǵandy jáne Ońtústik Qazaqstan oblystarynda, sondaı-aq 2 balabaqsha Mańǵystaý oblysy men ShQO paıdalanýǵa berilgen.

«Jalpy 70 nysandy paıdalanýǵa berý josparynan tek 5 nysan ǵana daıyn. Bul ne bári 8 paıyzdy quraıdy. Osyǵan baılanysty jergilikti atqarýshy organdar barlyq 70 nysannyń qurylysyn baqylaýǵa alyp, paıdalanýǵa berilýin qamtamasyz etýi tıis», - dedi Tımýr Súleımenov.