Bıyl elimizde 5 myń traktor men 900 kombaın qurastyrylady

ASTANA. QazAqparat – Bıyl elimizde 5 myń traktor men 900 kombaın qurastyrylady. Bul týraly búgin Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Osy jyly aýyl sharýashylyǵy mashınasyn jasaý sektorynda 5 myń traktor men 900 kombaın shyǵarylady. Qazirgi ýaqytta shyǵarylatyn tehnıka iri torapty qurastyrýǵa negizdelgen. Sondyqtan kásiporyndardyń shaǵyn torapty qurastyrý ádisine aýysýyn josparlap otyrmyz. Sektordy odan ári damytý ishki naryqtyń qajettiligin tolyq kólemde qamtymaıtyn aspaly jáne tirkemeli tehnıka óndirisin ulǵaıtýǵa baǵyttalatyn bolady», - dedi mınıstr.

Marat Qarabaevtyń aıtýynsha, tehnıkanyń nomenklatýralyq qataryn keńeıtý oqshaýlaý deńgeıin arttyrýǵa jáne sektordyń ımportqa táýeldiligin joıýǵa múmkindik beredi. Qostanaı oblysynda traktorlarǵa arnalǵan kabınalar óndirisi jolǵa qoıylǵan.

«Qazrost» jaýapkershiligi shekteýli seriktestigi kooperatsııalyq baılanystardyń belsendi damýynyń úlgisi sanalady. Mysaly, osy zaýytta astyq jınaıtyn kombaındardy jáne traktorlardy shyǵarý kezinde otandyq akkýmýlıatorlar, oraqtardy jyljytýǵa arnalǵan arbalar, teńgerimdi otyn baktar, aýa súzgileri jáne basqa da komponentter qoldanylady. Qostanaı qalasynda 50 myń sharshy metr alańda Oqshaýlaý ortalyǵy quryldy. Onda untaqty boıaý tsehy, presteý-dánekerleý ýchaskesi men dánekerleý tsehy, sondaı-aq daıyndaý tsehynyń japyraq tárizdes ıilý tandemi jolǵa qoıyldy», - dedi ol.