Bıyl elimizde 30 myń Hyundai kóligi qurastyrylady

NUR-SULTAN. QazAqparat – Bıyl elimizde 30 myń Hyundai kóligi qurastyrylady. Bul týraly halyqqa esep berý kezdesýinde QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Mashına jasaý salasynda óndiris kólemi 20 paıyzǵa ósti. Ósimge negizinen avtomobıl jasaý esebinen qol jetkizildi. Hyundai Trans Kazakhstan kompanııasy 7 myńnan astam jeńil avtokólik shyǵaryp, kólemin 18 esege arttyrdy. Jyl sońyna deıin kásiporyn 30 myń avtomobıl shyǵarýdy josparlap otyr, onyń 6 myńnan astamy eksportqa shyǵarylady», - dedi mınıstr.

Sondaı-aq ol «ZIKSTO» Aktsıonerlik qoǵamy men «Qazaqstan vagon jasaý kompanııasy» jaýapkershiligi shekteýli seriktestiginiń buryn toqtap qalǵan óndiristerin iske qosý esebinen temirjol tehnıkasy óndirisiniń 49 paıyzǵa óskenin aıtty.

«Mashına jasaý salasyndaǵy ósiminiń taǵy bir draıveri - aýyl sharýashylyǵy tehnıkasy boldy. Traktorlar men kombaındar óndirisi 42 paıyzǵa ulǵaıdy», - dedi Beıbit Atamqulov.