Bıyl elimizde 19 myń stýdent jataqhanasyz qalady

ASTANA. QazAqparat – Elimizde stýdentterge jataqhanadan 19 myń oryn jetispeıdi. Bul týraly stýdenttik ombýdsmen Aısulý Ernııazova aıtty, dep habarlaıdy QazAqparat tilshisi.

«Tósek-orynnyń resmı tapshylyǵy 19 myń oryn. Onyń basym bóligi, ıaǵnı 13 myńy Almaty qalasyna tıesi. Munan bólek Astanada – 2 200, Soltústik Qazaqstan oblysynda -2 318, Abaı oblysynda - 1 100, Túrkistan oblysynda 987 oryn jetispeıdi», - dedi Aısulý Ernııazova elordada AMANAT partııasynyń ǵımaratynda ótken brıfıngte.

Onyń dereginshe, elimizde 600 myńnan astam stýdent bar. Al respýblıkanyń barlyq óńirindegi jataqhanalar sany – 663. Onyń 250-i ýnıversıtetterge, 413-i kolledjderge qaraıdy.

Buǵan deıin elimizdiń 11 óńirinde stýdentter jataqhanasy tekserilip jatqanyn jazǵan edik.

Ýnıversıtetter boıynsha tekserilgen jataqhananyń 70-sin jaqsy dep aıtýǵa bolady. 39-y ortasha, 2 jataqhanada qurylys júrip jatyr.

Kolledjder boıynsha jalpy 126 jataqhananyń 75-i jaqsy. 36-synyń jaǵdaıy ortasha, 13-iniń jaǵdaıy nashar, 2 jataqhanada turý múmkin emes.