Bıyl elimizde 10 myń shaqyrym jol jóndeldi

NUR-SULTAN. QazAqparat - Elimizde 10 myń shaqyrym jolda qurylys jáne jóndeý jumystary júrgizildi. Bul týraly Indýstrııa jáne ınfraqurylymdyq damý mınıstrligi avtojol jobalaryn iske asyrý qorytyndysynda aıtyldy, dep habarlaıdy QazAqparat vedomstvonyń baspasóz qyzmetine silteme jasap.

«Respýblıkalyq jáne jergilikti mańyzy bar avtojoldardyń 10 myń shaqyrymy qurylys, rekonstrýktsııa jáne jóndeý jumystarymen qamtyldy. Onyń 3,6 myńy respýblıkalyq mańyzy bar joldar:

- Taldyqorǵan - Óskemen

- Qaraǵandy – Balqash – Býrylbaıtal – Kúrti - Qapshaǵaı

- Aqtóbe – Atyraý - Astrahan

- Qalbataý - Maıqapshaǵaı

- Úsharal - Dostyq

- Uzynaǵash - Otar

- Merki - Býrylbaıtal

- Qostanaı – Denısovka», delingen habarlamada.

Mınıstrliktiń málimetinshe, qurylys maýsymynda joldardaǵy jobalarǵa 200 myńdaı adam jáne 12 myńǵa tarta jol-qurylys tehnıkasy jumyldyrylǵan.

«Jyl qorytyndysynda joldardyń sapasyn arttyra otyryp, I jáne II sanattaǵy 2248 shaqyrym avtojol paıdalanýǵa berildi. Jaqyn mańdaǵy 120 eldi mekendi qamtyǵan senimdi kólik qatynasy qamtamasyz etildi. Іri eldi mekender janynda 6 aınalma joly salynyp, kólik jáne tranzıttik tasymaldar kólemi 2,5 ese artty. Bul rette jol qurylysyndaǵy qazaqstandyq qamtý 90%-dan asty», delingen habarlamada.

Jol boıyndaǵy servısti damytý úshin tıisti qyzmetterdi tolyq qamtıtyn 71 keshen iske qosyldy. Olar: kempıngter, motelder, janarmaı quıý stansalary, tehnıkalyq qyzmet kórsetý stansalary, tamaqtanatyn jáne saýda oryndary jáne t.b.