Bıyl Elektrondy úkimettiń Biryńǵaı baılanys ortalyǵyna 1 mıllıonǵa jýyq ótinish túsken
Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte "Ulttyq aqparattyq tehnologııalar" AQ Basqarma tóraǵasy Rýslan Eńsebaev málim etti.
Qazaqstannyń árbir azamaty táýlik boıy, qazaq jáne orys tilderinde Elektrondy úkimettiń Biryńǵaı baılanys ortalyǵynan ózine qajetti kez kelgen aqparatty ala alady. Búgingi tańda jyl basynan beri bizge azamattardan 950 myńnan astam ótinish kelip tústi. Bizdiń operatorlar kúnine 6 myńnan astam końyraýdy qabyldaıdy", - dedi R. Eńsebaev.
BUU sarapshylarynyń zertteýine sáıkes, Qazaqstan onlaın qyzmetterdi kórsetý ındeksi boıynsha 12-orynda jáne onlaın qatysýy boıynsha 2-orynda.
"Biz onlaın rejiminde kórsetiletin qyzmetterdiń sanyn árdaıym arttyryp kelemiz. Máselen, keleshekte elektrondy úkimettiń qyzmet kórsetý aıasyna tirkeýdiń keshendi qyzmetterin, balanyń týýy týraly tirkeýdiń biryńǵaı úlgisin jasaýdy, jumyssyz jáne shet el azamattaryn tirkeýdi, sonymen qatar elektrondy vızalardy berýdi engizýdi josparlaýdamyz. Avtomattandyrýǵa jatatyn barlyq úderisterdi biz elektrondy nusqaǵa kóshirýdi kózdeýdemiz", - R. Eńsebaev.