Bıyl egis jumystaryna 413 myń tonna dızel otyny qajet
«Bıyl óńirlerdiń egis jumystaryn júrgizý úshin dızel otynyna qajettiligi 413 myń tonnany qurady. Bul ótken jyly bólingen kólemnen 13 myń tonnaǵa kóp. Qazirgi ýaqytta oblystardy munaı óńdeý zaýyttaryna bekitý kestesiniń jobasyn ázirleý, sondaı-aq egis jumystaryna josparlanatyn dızel otynynyń kólemi men baǵasyn kelisý júrgizilýde. Kóktemgi naýqandy tehnıkalyq qamtamasyz etý bóliginde aýyl sharýashylyǵy qurylymdarynda 141,7 myń traktor, 4300 birlik joǵary ónimdi egis kesheni, 73,2 myń sepkish, 221,2 myń topyraq óńdeý mashınasy bar», - dep atap ótedi Álıhan Smaıylov jaýabynda.
Onyń atap ótýinshe, vegetatsııalyq kezeńniń ornyqty ótýin qamtamasyz etý úshin ótken jyldyń qarasha aıynan bastap aldaǵy vegetatsııalyq kezeńge daıyndyq jumystary bastaldy. Máselen, Ekologııa jáne tabıǵı resýrstar mınıstrligi Vegetatsııaaralyq jáne vegetatsııalyq kezeńderdiń 2022-2023 jyldarǵa arnalǵan jumys josparyn bekitti. 2023 jyldyń birinshi toqsanynda transshekaralyq ózenderdiń basseınderi boıynsha aldaǵy vegetatsııalyq kezeńge arnalǵan boljamdy gıdrologııalyq derekterge sáıkes jyldyń boljamdy sýlylyǵy týraly sý paıdalanýshylardy habardar etý jónindegi jumystardy júrgizý kózdeledi.
«Sondaı-aq kórshiles eldermen memleketaralyq paıdalanýdaǵy sý qoımalarynda vegetatsııalyq kezeńge arnalǵan sý kólemin jınaqtaý rejımderin kelisý boıynsha jumys júrgizildi jáne osy jyldyń kókteminde vegetatsııalyq kezeńge aǵyzý kólemin aıqyndaý boıynsha tıisti jumys júrgiziletin bolady. Jalpy, kóktemgi egis jumystaryna daıyndyq máseleleri Úkimettiń turaqty baqylaýynda ári osy jumystardy ýaqtyly júrgizý jáne tuqym óndirisin yntalandyrý úshin is-sharalar qabyldanýda», - dedi Úkimet basshysy.