Bıyl egis alqaby 105 myń gektarǵa ulǵaıdy – Erbol Qarashókeev
«Ákimdikterdiń derekterine sáıkes, 2022 jylǵa arnalǵan egis alqaptarynyń boljamdy qurylymy qalyptasty. Jalpy egis alańy 23,1 mln gektardy quraıdy. Bul 2021 jyldyń kórsetkishinen 105 myń gektarǵa artyq. Mal azyq daqyldarynyń kólemi eleýli artyp, 3,6 mln gektarǵa jetti. Ol mal azyǵyn mol óndirýge jáne muqtaj óńirlerdiń qajettiligin qamtamasyz etýge múmkindik beredi. Sondaı-aq, kartop, kúnbaǵys, kókónis, ıaǵnı áleýmettik daqyldar alqaby ulǵaıdy. Agroónerkásip keshenin memlekettik qoldaýdyń jańa tásilderi, onyń ishinde tsıfrlyq tehnologııalardy paıdalana otyryp, aýyspaly egisti saqtaýǵa qatań tásildeme kózdelgenin atap ótkim keledi. Mysaly, maıly daqyldar joǵary rentabeldi jáne dándi daqyldarǵa qaraǵanda suranysqa ıe. Buǵan basa nazar aýdarý kerek», - dedi mınıstr ortalyq kommýnıkatsııalar qyzmetindegi baspasóz máslıhatynda.
Jalpy, onyń atap ótýinshe, kóktemgi egis jumystaryn júrgizýge daıyndyq kezinde aýa-raıy qubylystary eskeriletin bolady.
«Osylaısha, respýblıkadaǵy eginshiliktiń mańyzdy mindetteriniń biri - topyraqta ylǵal jınaý jáne ony utymdy paıdalaný jónindegi is-sharalardy júrgizý. Óńirler osyndaı jumys júrgizýde. Shamamen 3,1 mln gektar alańda qar toqtatý eki izben júrgizildi. Bul 2021 jyldyń tıisti kezeńiniń deńgeıinen 2,5 ese artyq. Qazirgi ýaqytta ylǵaldy jabý jumystary júrgizilip jatyr. Topyraqta ylǵaldyń jetkilikti jınaqtalýy ǵana jaqsy ónim bere alady», - dedi Erbol Qarashókeev.