Bıyl dúnıege kelgen sábıler sany byltyrǵydan 7,6 paıyzǵa az

NUR-SULTAN. QazAqparat - Ulttyq statıstıka bıýrosy bıylǵy qańtar-sáýirdegi demografııalyq ahýal týraly málimet taratty, dep habarlaıdy QazAqparat.

1 mamyrda elimizdegi halyq sany 19 199,8 myń adamdy qurady. Onyń ishinde qalalyqtar – 11 442,9 myń (59,6%), aýyldyqtar – 7 756,9 myń adam (40,4%).

2021 jylǵy 1 mamyrmen salystyrǵanda halyq sany 236,9 myń adamǵa nemese 1,2% ósti.

Erlerdiń úlesi - 48,6%, áıelder - 51,4%.

«Qańtar-sáýirde respýblıka halqynyń tabıǵı ósimi 2021 jylǵy qańtar-sáýirmen salystyrǵanda (88 myń adam) 9,8% kemip, 79,3 myń adamdy qurady. Tabıǵı ósimniń jalpy koeffıtsıenti 1000 adamǵa shaqqanda - 12,54 adam. AHAT organdary usynǵan azamattyq hal aktileri jazbasyndaǵy málimetti óńdeý nátıjesinde 2022 jylǵy qańtar-sáýirde týǵandar sany 127 myń adamdy qurady, bul 2021 jylǵy qańtar-sáýirge (137,4 myń adam) qaraǵanda 7,6% az. Týýdyń jalpy koeffıtsıenti 1000 adamǵa - 20,08 jaǵdaı» delingen habarlamada.

Qarastyrylyp otyrǵan kezeńde qaıtys bolǵandar sany 47,7 myń adamdy qurady, bul 2021 jylǵy qańtar-sáýirge (49,5 myń adam) qaraǵanda 3,6% az.

Ólim-jitimniń jalpy koeffıtsıenti - 1000 adamǵa 7,54 qaıtys bolǵan.

2022 jylǵy qańtar-sáýirde respýblıkada 1 jasqa deıin 1 113 sábı shetinegen.

2021 jylǵy tıisti kezeńmen salystyrǵanda (1109 shetinegen náreste) 0,4% artty. Náreste ólim-jitiminiń koeffıtsıenti 1000 jańa týǵan sábıge shaqqanda - 8,76 oqıǵa.