Bıyl doktorantýraǵa túsýshiler de test tapsyrady
Bul týraly Qazaqstan Respýblıkasy Bilim jáne ǵylym vıtse-mınıs Mıras Dáýlenov vedomstvonyń aqparat alańynda aıtty.
«Bıyl doktorantýra baǵdarlamasyna túsý erejesine ózgerister engizildi. Onyń ishinde túsý emtıhanyn jańasha formatta ótkizý qarastyrylǵan.
Doktorantýraǵa ótinishterdi qabyldaý 3 shildede bastalyp, 3 tamyzǵa deıin jalǵasady. Doktorantýraǵa túsý emtıhandary 4-20 tamyz aralyǵynda ótedi. Endi doktorantýraǵa túsýshiler de kompıýterlik formatta test tapsyrady. Byltyr osy format magıstratýraǵa túsýshiler arasynda synalyp, sátti aıaqtalǵan bolatyn», - dedi vıtse-mınıstr.
Ol, sondaı-aq doktorantýraǵa túsýshilerge qoıylatyn negizgi talaptardy da atady.
«Doktorantýraǵa túsýshilerdiń sanatyna magıstr dárejesi bar adamdar qabyldanatynyn atap ótkim keledi. Eńbek ótili 9 aıdan kem bolmaýy kerek. Al medıtsınalyq mamandyqtar boıynsha rezıdentýrany aıaqtaǵan bolýy kerek. Buryn bul merzim bir jyl bolatyn. Biraq JOO-lar men túsýshilerdiń ótinishi eskerilip, 9 aıǵa qysqartyldy. Doktorantýraǵa túsýshilerdiń qujattary da Ulttyq testileý ortalyǵynyń aqparattyq júıesi arqyly qabyldanady», - dedi Mıras Dáýlenov.
Mınıstr orynbasarynyń sózine qaraǵanda, doktorantýra 6 qadamnan turady.
«Birinshi qadam – Ulttyq testileý ortalyǵynda tirkelý, ekinshi qadam – óńirlik testileý ortalyǵynda emtıhan tasyrý. Osydan keıin túsý emtıhandarynyń nátıjesi jarııalanady. Al appelıatsııa berýge jeke saıt usynylady. Grant taǵaıyndalǵan týraly kýálik tek elektrondy formatta túsýshiniń jeke kabıneti arqyly beriledi. Tirkelý kezinde túsýshi anketany toltyryp, bir JOO-ny kórsetedi. Bilim berý baǵdarlamasynyń bir tobyn jáne emtıhan tapsyrý ornyn tańdaıdy. Emtıhannyń ótý tártibi men orny týraly túsýshige 3 kún buryn habarlanady. Úmitkerler kompıýter aldynda otyryp esse jazady. Osydan keıin doktorantýrada oqýǵa daıyndyǵy týraly test tapsyrady. Budan keıin ózi tańdaǵan bilim berý baǵdarlamasy boıynsha test tapsyrady», - dedi vıtse-mınıstr.
Atalmysh sharada mınıstr Ashat Aımaǵambetov ǵylymı dáreje qorǵaýshylardan dıssertatsııanyń qazaq tilindegi nusqasy talap etiletinin aıtqan bolatyn.