Bıyl byltyrǵyǵa qaraǵanda máseleler keń aýqymda qaralyp jatyr - "Qazaq ınterneti" QB bas dırektory
"Qazaqstandaǵy ınternettiń damý qarqynyna qazaq tildi ınternet resýrstary áli kóp jaǵynan ilese almaı jatyr. Bizdiń búgin osy jerge jınalyp, alys-jaqyn shet elden kelip jatqan áriptestermen aralasyp, pikir almasyp jatqanymyzdyń basty sebebi - osy. Munda biz óz elderimizde ulttyq ınternet qalaı damyp jatqanyn aıtyp, bir-birimizden úırenetinimiz bolsa -úırenip, bilmeıtinimiz bolsa - úıretip ózara tájiriıbe almasyp jatyrmyz", - deıdi "Qazaq ınterneti" qoǵamdyq birlestiginiń bas dırektory, "Qazaq.kz" ınternet jýrnalynyń bas redaktory Serikqazy Kákibalanov. Onyń aıtýynsha, Qazaqstandyq ınternet aptalyǵynda bıyl byltyrǵyǵa qaraǵanda máseleler keń aýqymda qaralyp jatyr. Sondaı-aq qazaqsha ınternetke bıyl arnaıy tolyǵymen bir kún arnalyp otyr. Byltyr oǵan az ǵana ýaqyt bólingen bolatyn.