Bıyl burynǵy jyldardaǵydaı tasqyn qaýpi joq – Serik Qojanııazov

NUR-SULTAN. QazAqparat – Bıyl taýly aımaqtarda tasqyn qaýpi uzaq saqtalýy múmkin. Ekologııa, geologııa jáne tabıǵı resýrstar vıtse-mınıstri Serik Qojanııazov «Qazgıdromet» málimetterine súıene otyryp osyndaı boljam aıtty, dep habarlaıdy QazAqparat tilshisi.

«Qazgıdromettiń» málimeti boıynsha, Qyzylorda, Atyraý, Mańǵystaý oblystarynda qar tolyǵymen erip ketti. Sondaı-aq, Túrkistan, Jambyl, Almaty oblystarynyń jazyq jerlerinde túgeldeı eridi. Alaıda, jazyq óńirlerde tasqyn qaýpi tek kóktemde týyndasa, Shyǵys Qazaqstan, Almaty, Jambyl, Túrkistan oblystarynyń taýly bólikterinde tasqyn qaýpi qar erigen kezde jáne qatty jaýyn bolǵan kezde kúsheıedi», - dedi vıtse-mınıstr.

Onyń sózine qaraǵanda, bıyl kóktemniń alǵashqy kúnderi sýyq boýyna baılanysty Qaraǵandy, Aqmola, SQO, Qostanaı, BQO, Aqtóbe óńirlerinde qar áli erip bitpegen.

«Bir sózben aıtqanda, «Qazgıdromettiń» málimet boıynsha bıyl 2015, 2017 jyldardaǵydaı tasqyn qaýpi joq. Biraq temperatýranyń kúrt artyp, jaýyn-shashynnyń jıileýi Qaraǵandy, Aqmola, Soltústik Qazaqstan, Qostanaı, Almaty, Túrkistan, Jambyl jáne Shyǵys Qazaqstan oblystarynda ishinara sý basý kórinisteri bolýy múmkin», - dedi Serik Qojanııazov.

Eske salsaq, Tótenshe jaǵdaı mınıstrliginiń málimeti boıynsha, elimizdegi 171 eldi mekendi sý basý qaýpi li seıilmegen.

Tasqyn maýsymyna birneshe qurylymnyń salasynyń jeke quramynan 10 myń adam men 1,8 myń tehnıka jumyldyrylyp otyr.