Bıyl «Býrabaı» ulttyq parkin damytý boıynsha qandaı jumystar atqarylady
«Prezıdent Іs basqarmasynyń vedomstvolyq baǵynysty uıymdarynda basymdyq beriletin jumystardyń jaı-kúıine toqtalýdy jalǵastyrǵym kelip otyr. Jazǵy demalys maýsymy jaqyn qalǵandyqtan, búgingi taqyrybymyz «Býrabaı» ulttyq parkiniń ınfraqurylymyn damytýǵa, ásem tabıǵatty saqtaýǵa arnalady», - deıdi A.Dádebaev.
Aıtýynsha, byltyr kýrorttyq aımaqqa 711 myńnan astam adam keldi. Bul tek ulttyq parktiń baqylaý-ótkizý beketinen ótkenderdiń sany.
«Al bıylǵy kórsetkish byltyrǵydan kem túspeıdi dep mejelenip otyr. Árıne, týrızmdi damytyp jatqan óńirge demalýshylardyń kóp kelgeni jaqsy. Degenmen, ulttyq park úshin bul birshama júk ekenin de eskergen jón. Sondyqtan «Býrabaı Damý» kásiporny men «Býrabaı» ulttyq parki belsenip jumys isteýi kerek. Bul, ásirese, órt qaýipsizdigi men qoryqty qorǵaýǵa qatysty», - dep jazady QR Prezıdenti Іs basqarýshysy.
Málim etilgendeı, bıyl jalǵasyn tabatyn «Smart National Park Burabay» jobasynyń aıasynda 5 ótkizý-baqylaý beketin avtomattandyrý, qorshaǵan ortaǵa monıtorıng jáne saraptama jasaıtyn qosymsha quraldar ornatý, ǵylymı jumystardy kúsheıtýjosparlanyp otyr. Sonymen qatar órtti erte anyqtaıtyn qosymsha 3 baqylaý kamerasy qoıylmaq. Osylaısha, baqylaý kameralary bar 17 munara «Býrabaı» parkiniń ǵana terrıtorııasyn emes, irgeles jatqan qorǵalatyn aýmaqty da baqylap otyratyn bolady. Bul – 377 166 gektar jer.
«Jalpy, smart-júıe órtti der kezinde anyqtap, tez arada aýyzdyqtaýda óz tıimdiligin kórsetti. Mysaly, byltyr 21 órt oqıǵasy tirkelip, jalyn sharpyǵan jer kólemi 1,3 gektarmen shekteldi. ıAǵnı, tilsiz jaýdyń taralý aýmaǵy 2021 jylmen salystyrǵanda 8,6 ese azaıdy.
Aıta keterlik taǵy bir jańalyq, bıyl jazda týrısterdiń at shaldyryp, aıaq sýytýyna arnalǵan qosymsha 35 beket boı kóteredi, onyń ishinde 26 beketke ot jaǵatyn oshaq qoıylady.
Stol, sáki, oshaq, órt sóndirý quraldary qoıylǵan osyndaı oryndar Úlken Shabaqty, Kishi Shabaqty kólderiniń jaǵasynda, sondaı-aq «Terrasa park» qonaqúıinen «Aqbýra» kýrortyna deıin sozylyp jatqan velosıped jolynyń boıynda ornalasady.
Ot jaǵýǵa bolmaıtyn, tek tamaqtanatyn, demalatyn oryndar «aıqulaq» músinnen bastap Abylaı han alańyna deıingi velojoldyń boıynda, Kenesary úńgirine jaqyn mańda salynady», - delingen A.Dádebaev habarlamasynda.
Aıta keteıik, týrısterge arnalǵan beketterdiń naqty kartasyn «Býrabaı Damý» JShS men «Býrabaı» MUTP saıttarynan, sondaı-aq Ulttyq parktiń mobıldik qosymshasynan kórýge bolady. «Ot pen sý — tilsiz jaý» degen sóz tegin aıtylmaǵan. Tabıǵat aıasynda demalǵan kezde saqtyq sharalaryn umytpaıyq.