Bıyl bomba týraly jalǵan aqparat faktileri boıynsha 37 qylmystyq is tirkelgen
Bul jaıynda QR Іshki ister mınıstrliginiń baspasóz qyzmetinen málim etti, dep habarlaıdy QazAqparat tilshisi.
«2022 jyly Qazaqstan Respýblıkasy Qylmystyq kodeksiniń «Terrorızm aktileri týraly-qasaqana jalǵan aqparat taratý» 273-babymen ishki ister organdarynda 37 qylmystyq is tirkelgen. Sotqa 8 is jiberildi. Qalǵan isterge qatysty tergeý amaldary jalǵasyp jatyr. Qylmystyq jaýapqa 11 adam tartyldy», delingen QazAqparat tilshisiniń saýalyna mınıstrlik jaýabynda.
Vedomstvonyń atap ótýinshe, atalǵan qylmystyq ister boıynsha sońǵy sheshimdi sot qabyldaıdy. Sondyqtan mınıstrlikte munan ózge esh aqparat joq.
Esterińizge sala keteıik, 4 sáýirde Nur-Sultan men Almatynyń birqatar mekemeleriniń elektrondy mekenjaılarynda jarylǵysh zat qoıylǵany týraly aqparat taraǵan bolatyn.
Arnaıy júrgizilgen jedel izdestirý sharalarnyń barysynda Qostanaı oblysy, Jitiqara qalasynyń 1986 jyly týǵan turǵyny ustaldy. Ol osy qaladaǵy mekemelerdiń birinde IT mamany bolyp qyzmet etken. Kúdikti aqparatyq tehnologııalar salasyndaǵy biliktiligi men ózge de tehnologııalardy paıdalana otyryp, elorda men Almatynyń iri nysandarynyń mekenjaılaryna jarylǵysh zat qoıylǵany týraly habar taratqan. Kúdikti óziniń áreketin buzaqylyq nıetimen istegenin moıyndady jáne ol qamaýǵa alyndy.