Bıyl «Bolashaq» baǵdarlamasy boıynsha 600 stıpendııa beriledi

ASTANA. QazAqparat - Bıyl «Bolashaq» baǵdarlamasy boıynsha 600 stıpendııa beriledi. Bul týraly búgin Aqordada QR Memlekettik hatshysy Gúlshara Ábdiqalyqovanyń tóraǵalyǵymen ótken Shetelde kadrlar daıarlaý jónindegi respýblıkalyq komıssııasynyń kezekti otyrysy aldynda elimizdiń Bilim jáne ǵylym vıtse-mınıstri Tahır Balyqbaev málim etti.

«Búgingi otyrys barysynda úmitkerlerdiń kezekti tobyna stıpendııa taǵaıyndalatyn bolady. Buǵan qosa, aǵymdaǵy jyly komıssııanyń birneshe otyrysy ótip, onda taǵy da stıpendııalar bekitiledi».

Sonymen qatar ol respýblıkalyq komıssııa otyrysynda Elbasynyń «100 naqty qadam» ult josparyn júzege asyrý máselesine basa nazar aýdarylatyndyǵyn atap ótti. Onyń aıtýynsha, ult josparynda halyqaralyq qarjy ortalyǵyn, arbıtrajdyq ortalyq qurý máseleleri qarastyrylǵan. Sondyqtan «Bolashaq» baǵdarlamasy aıasynda atalǵan baǵyttardy kadr daıyndaýǵa basa nazar aýdarylady.

«Josparǵa sáıkes aǵymdaǵy jyly 600 stıpendııa taǵaıyndaý josparlanyp otyr. Qazirgi ýaqytta shamamen 140-y berildi, qalǵany qarastyrylady. Memleket basshysy atap ótken Astanada qurylatyn halyqaralyq qarjy ortalyǵyn aıtar bolsaq, onda bizge bul baǵytta atalǵan ortalyqta jumys isteıtin zańgerler, qarjygerler men ekonomıster qajet bolady. Sondyqtan osy mamandyqtarǵa basa nazar aýdarylady», - dedi T.Balyqbaev.