Bıyl bıznes sýbektileriniń ústinen qozǵalǵan 400-den astam qylmystyq is toqtatylǵan
«Quqyq qorǵaý organdarynyń bızneske kórsetetin qysymyn tómendetý jumysyna toqtalǵym keledi. Bul – Prezıdenttiń tikeleı tapsyrmasy. Qyrkúıek aıynyń basynda kúsh qurylymdarynyń bızneske jasaıtyn qysymyna naqty tosqaýyl qoıý úshin men barlyq quqyq qorǵaý jáne arnaıy organdarǵa arnalǵan nusqaýǵa qol qoıdym. Prokýratýra organdary jınaqtaǵan tájirıbe osy qujattyń negizine alyndy. Bizge qylmystyq orbıtaǵa túsken kásipkerlerden kún saıyn shaǵym túsedi. Іsti toqtatý, tutqyndaý men basqa da shekteýlerdi alyp tastaý boıynsha shara qabyldadyq. Jyl basynan beri bıznes sýbektilerine qatysty zańsyz qozǵalǵan 400-den astam qylmystyq is toqtatyldy», - dedi Berik Asylov bıznes ókilderimen kezdesýde.
Sondaı-aq, ol barlyq quqyq qorǵaý jáne arnaıy organdarǵa arnalǵan nusqaý boıynsha bıznes nysandaryna qarsy qylmystyq is qozǵaý protsesi tártipke keltirilgenin atady.
«Eger kásipkerdiń tekserý nemese aýdıt nátıjelerine shaǵymdaný merzimi ótpese;
- sheshimniń negizinde qylmystyq qýdalaý organynyń shtattyq mamany jasaǵan zalal týraly formaldy qorytyndy jasalsa;
- merdiger únemdeý arqyly paıda tapsa jáne oryndalǵan jumystyń sapasyna qatysty shaǵymdar bolmasa, bızneske qarsy is bastaýǵa tyıym salynady», – dedi Bas prokýror.