Bıyl birinshi toqsanda shıkizat pen daıyn ónimniń baǵasynyń ósýi tejeledi – Ulttyq bank

NUR-SULTAN. QazAqparat - QR Ulttyq bankiniń Aqsha-kredıt saıasaty departamentiniń dırektory Jandos Shaımardanovtyń 2021 jylǵy IV toqsandaǵy ekonomıkanyń naqty sektory kásiporyndaryna júrgizilgen taldaý saýalnama (salalyq konıýktýralyq sholý) nátıjesi jarııalandy, dep habarlaıdy QazAqparat.

QR Ulttyq banki taratqan málimetterge qaraǵanda, Qazaqstanda naqty sektor kásiporyndaryna júrgizilgen saýalnama qorytyndysy daıyn ónimge suranysqa qatysty jaǵdaı qurylystan basqa barlyq salalarda jaqsarǵanyn kórsetti.

Kólikte suranys kórsetkishi artyp, qurylysta kórsetkishtiń máni jaqsarsa da, burynǵydaı 50 belgisinen tómen. 2022 jylǵy I toqsanda aýyl sharýashylyǵyn qospaǵanda, barlyq qarastyrylyp otyrǵan salalarda suranys jaqsaratyny kútiledi.

2021 jylǵy IV toqsanda shıkizat pen materıaldar jáne daıyn ónim baǵasynyń ósý qarqyny jedeldegeni barlyq salalarda baıqaldy. 2022 jylǵy I toqsanda shıkizat pen materıaldar jáne daıyn ónim baǵasynyń ósý qarqynyń tejelýi kútiledi.

Jalpy ekonomıka boıynsha óndiristik qýattardy júkteý deńgeıi is júzinde ózgergen joq, aýyl sharýashylyǵynda tómendep, qurylys pen saýdada azdap ósti. Barynsha joǵary deńgeı taý-ken óndirý salasynda (61,3 %), tómen deńgeı kólik pen qurylysta (52,2% jáne 52,0%) saqtalyp otyr.

Básekelestik mańyzdylyǵy joǵary deńgeıde. Naryqtyq básekelestik ásirese saýda kásiporyndarynda qatty baıqalyp otyr. Saýda kásiporyndardyń 41,5%-y onyń óz bıznesine áserin sezinip otyr. Eń az úles taý-ken ónerkásibinde baıqaldy (14,8%).

Reseı rýbli sheteldik áriptestermen esep aıyrysýda paıdalanylatyn negizgi valıýta bolyp qalýda. Óńdeý ónerkásibinde rýbldi kásiporyndardyń 64,9%-y, saýdada 56,5%-y paıdalanady. AQSh dollary taý-ken ónerkásibinde ǵana basym (59,6%).

Saýalnamaǵa barlyǵy 2,6 myńnan astam óndirýshi jáne óńdeý ónerkásibi, qurylys, saýda, aýyl sharýashylyǵy, kólik jáne qoımaǵa jınaý kásiporyndary qatysty.