Bıyl bıdaı túsimi qandaı bolady

NUR-SULTAN. QazAqparat – Bıyl elimizde dándi daqyldardyń jalpy túsiminiń boljamdy kólemi 18,3 mln tonna bolady. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Álemde qalyptasqan geosaıası jaǵdaıǵa, sondaı-aq birqatar elde dándi daqyldar ósiminiń tómendeýine baılanysty aldymyzda azyq-túlik qaýipsizdigin qamtamasyz etý boıynsha mańyzdy mindet tur. Oblystar ákimdikteriniń derekterine sáıkes, dándi daqyldardyń jalpy túsiminiń boljamdy kólemi 18,3 mln tonna bolady, Onyń ishinde bıdaı 13,4 mln tonnadan asady dep kútilýde. Budan basqa, respýblıkada 3,1 mln tonna kóleminde aýyspaly astyq qaldyǵy, onyń ishinde 2,5 mln tonna bıdaı bar», - dedi mınıstr.

Erbol Qarashókeevtiń atap ótýinshe, aýyspaly qaldyqtardy eskere otyryp, jalpy astyq jınaýdyń kútiletin kólemi respýblıkanyń ishki qajettiligin tolyq qamtamasyz etý, sondaı-aq astyqtyń belgili bir kólemin eksportqa shyǵaryp, tıisinshe dástúrli naryqtarymyzdaǵy saýda pozıtsııalarymyzdy saqtaý úshin jetkilikti.