Bıyl Batys Qazaqstan oblysynda 4600 baspana salynady

ORAL. QazAqparat - Batys Qazaqstan oblysynda bıyl qarjylandyrýdyń barlyq kózderi esebinen 523 myń sharshy metr nemese 4600 baspana turǵyzý mindeti tur, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Bıylǵy І toqsanda salaǵa 7,1 mlrd teńge ınvestıtsııa salynyp, jalpy aýdany 77,5 myń sharshy metr bolatyn 568 turǵyn úı paıdalanýǵa berildi. Onyń ishinde – 487 jeke úı.

Jalpy bıyl «Nurly jer» memlekettik baǵdarlamasy sheńberinde batys Qazaqstan oblysynda ınjenerlik-kommýnıkatsııalyq ınfraqurylym jáne turǵyn úı qurylysyna 18,6 mlrd teńgege 41 joba iske asyrylyp, 845 adam jumyspen qamtylady.

Kredıttik nemese satyp alý quqyǵynsyz jalǵa beriletin 1763 páterdi paıdalanýǵa berý josparlanyp otyr.

Onyń ishinde satyp alý quqyǵynsyz jalǵa beriletin turǵyn úı qurylysyna 12 jobany iske asyrý úshin 3,4 mlrd teńge qarastyrylǵan. Jyl sońyna deıin jalpy aýdany 30,9 myń sharshy metr bolatyn 590 jalǵa beriletin páter paıdalanýǵa beriledi. Halyqtyń az qamtylǵan áleýmettik toptaryna, kóp balaly otbasylarǵa beriletin ol baspanalardyń qurylysyna 165 adam jumysqa tartylady.

Kredıttik turǵyn úı qurylysyna 14 jobany iske asyrý úshin 13 mlrd teńge qarastyrylǵan. Oǵan 81,8 myń sharshy metr turǵyn úı nemese 1173 páterdi paıdalanýǵa berý josparlanǵan.

Sonymen qatar, «Nurly jer» memlekettik baǵdarlamasy aıasynda 2%-ben nesıe beretin «Baqytty otbasy» baǵdarlamasyn iske asyrýǵa bıyl respýblıkalyq bıýdjetten oblys ákimdigine 200 turǵyn úı qaryzyna 2 mlrd teńge qarastyrylǵan.

Turǵyn úı qurylysy aýdandaryna ınjenerlik-kommýnıkatsııalyq ınfraqurylym júrgizýge 15 joba iske asyrylady. Ol maqsatqa 2,2 mlrd teńge qarajat bólinedi. Atalǵan jobalar boıynsha 210 jumys orny ashylady.