Bıyl barlyq qazaqstandyq elektrondy úı kitapshasyna tirkeledi

ASTANA. QazAqparat - Aǵymdaǵy jyldyń sońyna deıin barlyq qazaqstandyq elektrondy úı kitapshasyna engiziletin bolady. Bul týraly búgin Májilistegi Úkimet saǵatynda Іshki ister mınıstri Qalmuhanbet Qasymov aıtty, dep habarlaıdy QazAqparat.

«Úı kitapshasy Ádilet mınıstrliginiń meken-jaıdy tirkeý kodyna baılanystyrylatyn bolady. Ádilet mınıstrligi mundaı kodty bir ǵımaratqa ǵana beredi jáne ol tipti kóshe, aýdan nemese qala ataýy ózgerse de ózgeriske ushyramaıdy. Atalǵan tirkeý kodyna biz úı kitaphanasyn baılanystyramyz. Qazir tirkeýdi bastadyq. Qazaqstannyń 18 mln azamatynyń búginde 5 mıllıony tirkeldi. Ony jyldyń sońyna deıin bitirýge tyrysamyz. Osydan keıin azamattarymyz atalǵan úı kitapshasy negizinde meken-jaıdyń elektrondy anyqtamasyn elektrondy túrde tegin ala alady», - dedi ol.

Mınıstrdiń atap ótýinshe,  elektrondy úı kitabyn engizýdiń arqasynda óte kóp adam tirkelgen meken-jaıdy anyqtaýǵa múmkindik bolady.

«Bul Memleket basshysy nazar aýdarǵan «rezeńke páterler» problemasyn túbegeıli sheshýge múmkindik beredi», - dedi Qalmuhanbet Qasymov.

Al «Azamattarǵa arnalǵan Úkimet» memlekettik korporatsııasynyń basshysy Abylaıhan  Ospanov ta  elektrondy meken-jaı anyqtamasy tegin beriletindigin atap ótti.

«Meken-jaı anyqtamasyn alýǵa baratyn azamattar málimetterdi esh problemasyz alady. Ol (málimetter bazasy) barlyq azamattardyń JSN-na jyljymaıtyn múlik meken-jaıynyń kodyn berý protsedýrasy ótkizilgennen keıin tolyqqandy bolady. Meken-jaı anyqtamasy elektrondy úkimet portaly arqyly onlaın-rejimde jáne tegin beriletin bolady», - dedi ol.