Bıyl balalarǵa qatysty zorlyq-zombylyqtyń 252 faktisi tirkelgen
Túrkistan qalasynda «Qazaqstanda balalarǵa qatysty zorlyq-zombylyqtyń aldyn alý» taqyrybynda dóńgelek ústel otyrysy ótip jatyr.
Іs-sharanyń maqsaty – qoǵamda ádep normasyn qalyptastyrý, profılaktıka sharasyn egjeı-tegjeıli talqylap, azamattyq sektor jáne jaýapty memlekettik organdarmen birlesip jedel áreket etý.
Jıynda Aqparat jáne qoǵamdyq damý mınıstri Darhan Qydyráli balalarǵa kórsetiletin zorlyq-zombylyqtyń aldyn alý, azamattyq belsendiler, memlekettik organdar jáne BAQ ókilderimen birlesip, qoǵamda balalardy qorǵaýǵa baǵyttalǵan minez-qulyqty, ádep normalaryn jáne qundylyqtar júıesin qalyptastyrý qajettigin atap ótti. Sondaı-aq elimizdiń túkpir-túkpirindegi otbasyn qoldaý ortalyqtarynyń tıimdiligin arttyrý mańyzdylyǵyna toqtaldy.
«Búgingi is-sharany arnaıy kıeli Túrkistan jerinde uıymdastyrýdyń sebebi – osyndaı aýyr qylmystyń jurt bolyp jıylyp, sheshimin tabý, qoǵamda ádep normasyn qalyptastyrý, profılaktıka sharasyn egjeı-tegjeıli talqylap, azamattyq sektor, jaýapty organdarmen birlesip jedel is-qımyl jasaý. Búgin arqany keńge salsaq, erteń kesh bolýy múmkin. Dabyraǵa salmaı, eshkimdi dúrliktirmeı, problemany ashyq moıyndap, ekshelgen sheshim, zorlyq-zombylyqqa qarsy qoǵam mádenıetin nyǵaıtýymyz qajet», - dedi Darhan Qydyráli.
Mınıstrdiń aıtýynsha, dúnıejúzilik densaýlyq saqtaý uıymynyń 2022 jylǵy málimeti boıynsha, árbir besinshi áıel men ár on úshinshi er adam balalyq shaǵynda (0-17 jas) jynystyq zorlyq-zombylyqqa ushyraıdy.
«Al Qazaqstandaǵy statıstıkaǵa keletin bolsaq, 2022 jyly elimizde 16 jasqa tolmaǵan balalarmen jynystyq qatynasqa túsý nemese soǵan májbúrleý, jas balalardy azǵyndyqqa salý faktisi boıynsha 383 qylmystyq is qozǵalsa, bıylǵy 6 aıda 252 qylmys tirkelgen», - dedi vedomstvo basshysy.