Bıyl avtonesıe baǵdarlamasyna 26 mlrd teńge qarastyrylady - QDB

ASTANA. QazAqparat - Qazaqstan Damý Banki 2016 jyly avtonesıe baǵdarlamasyna 26 mlrd teńge jumsaýdy kózdeıdi. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Qazaqstan Damý Banki» AQ Basqarma Tóraǵasy Bolat Jámishev málim etti.

Tóraǵanyń sózine qaraǵanda, byltyrǵy jyly avtonesıe baǵytynda 15 mlrd teńge bólingen edi, buǵan qosymsha 4 mlrd teńge «BRK lızıng» arqyly qarastyryldy. «Lızıng boıynsha 4 mlrd teńge tolyǵymen ıgerildi, al 15 mlrd teńgeniń tek 87 paıyzy ǵana oryndaldy. Buǵan sebep - jyl sońyna taman devalvatsııa qarqyny údep, sonyń saldarynan suranys ta kúrt túsip ketti», - deıdi B. Jámishev. Onyń aıtýynsha, aǵymdaǵy jyldyń basynda avtonesıe boıynsha qosymsha 11 mlrd teńge bólingen. Sonymen qatar, QDB avtonesıe salasynda aldaǵy jumystardy aıqyndaý boıynsha Úkimetpen birlese belsendi jumysqa kiriskeli otyr.

«8 qańtardan bastap osy baǵytqa qosymsha 11 mlrd teńgeni baǵyttadyq. Osylaısha, tutastaı alǵanda avtonesıe baǵdarlamasyna 26 mlrd teńge qarastyrylyp otyr. Qazirgi ýaqytta banktermen, avtoóndirýshilermen birlesip, qarajatty tıimdi ári nátıjeli paıdalaný máselesin qarastyrýdamyz. Tutastaı alǵanda, elimizde avtonesıe baǵdarlamasyna qyzyǵýshylyq úlken. Máselen, bıylǵy qarastyrylǵan qarajattyń 12,7 paıyzyna klıentterden tapsyrys túsip otyr», - dedi B. Jámishev.