Bıyl aýyldyq eldi mekenderdi damytýǵa qansha qarajat bólindi

ASTANA. QazAqparat – Eldegi 6,3 myń aýyldyń 3,5 myńynyń damý áleýeti joǵary. Úkimet otyrysynda Ulttyq ekonomıka mınıstri Álibek Qýantyrov osyndaı derek keltirdi, dep habarlaıdy QazAqparat tilshisi.

«Qazirgi tańda respýblıkada 6 295 aýyldyq eldi meken bar. Onda 7,5 mln aýyl turǵyny nemese halyqtyń 38%-y turady. Sol aýyldardyń ishinen damý áleýeti joǵary 3,5 myń aýyl iriktelip alyndy. Onda aýyl turǵyndarynyń 93%-y turady», - dedi ol.

Mınıstr aýyldardyń ınfraqurylymyn damytý «Aýyl – el besigi» baǵdarlamasy sheńberinde basym tártippen júzege asyp jatqanyn atap ótti.

«Aýyl – el besigi» baǵdarlamasy boıynsha 2019-2022 jyldary respýblıkalyq bıýdjetten 326 mlrd teńge bólinip, 3,7 myńnan astam joba iske asyryldy. Bul turǵyn úı-kommýnaldyq sharýashylyq salasyndaǵy 334 obektini, 1200 áleýmettik nysandar men 2 myńnan astam kólik ınfraqurylymy obektilerin salýǵa jáne jóndeýge múmkindik berdi. Bıyl jalpy 771 aýyldyq eldi mekende 1 800 jobany iske asyrý úshin 218,2 mlrd teńge bólindi.

Onyń ishinde turǵyn úı-kommýnaldyq sharýashylyq salasyndaǵy 244 joba, 383 áleýmettik nysandar jáne aýylishilik joldardy jaqsartý boıynsha 1 200 joba iske asyrylyp jatyr», - dedi vedomstvo basshysy.