Bıyl aýyl turǵyndaryna 2,5 paıyzdyq 11 606 mıkrokredıt beriledi

ASTANA. QazAqparat – QR Premer-Mınıstri Álıhan Smaıylov Senat depýtattarynyń saýalyna joldaǵan jaýabynda aýyl turǵyndaryna 2,5 paıyzdyq nesıe berý úshin qansha qarajat bólinetinin aıtty, dep habarlaıdy QazAqparat tilshisi.

Senat depýtattarynyń saýalynda Jambyl oblysyndaǵy aýyl halqynyń tabysyn arttyrý jobasyn repsýblıka kóleminde masshtabtaý týraly usynys aıtylǵan bolatyn.

«2022 jylǵy qazanda Respýblıkalyq bıýdjet komıssııasynyń sheshimimen Aqtóbe jáne Jambyl oblystarynda aýyl halqynyń tabysyn arttyrý jónindegi jobany masshtabtaý úshin aýyl halqyna 2,5%-ben shaǵyn kredıt berý tetigin engizý qoldaý tapty.

Máselen, qarasha aıynyń sońynda Aqtóbe oblysynyń ákimdigimen 3 mlrd teńgege jáne Jambyl oblysynyń ákimdigimen 6 mlrd teńgege úshjaqty kredıttik sharttar jasalyp, odan ári kredıtteý úshin qarajat aýdaryldy.

Sonymen qatar bıyl respýblıkalyq bıýdjette aýyl halqynyń tabysyn arttyrý jónindegi jobany masshtabtaýdy iske asyrýǵa 11 606 mıkrokredıt berý josparymen 52,4 mlrd teńge, onyń ishinde Jambyl oblysy úshin 3,6 myń mıkrokredıt berý josparymen 11 mlrd teńgeden astam qarajat kózdelgen», - dep jazady Úkimet basshysy.

Onyń sózinshe, respýblıkalyq bıýdjetti naqtylaý aıasynda oblys ákimdikteri 2023 jylǵa 15 090 mıkrokredıt berý úshin 73,8 mlrd teńge suraǵan. Onyń ishinde Jambyl oblysynyń ákimdigi 4 myń mıkrokredıt berý úshin 20 mlrd teńge soma surap otyr.

«Joǵaryda baıandalǵandardy eskere otyryp, qosymsha qarjy bólý máselesi zańnamada belgilengen tártippen Respýblıkalyq bıýdjet komıssııasynyń otyrysynda qaralatyn bolady», - dep jazady Álıhan Smaıylov.