Bıyl aýyl sharýashylyǵy óniminiń kóleminde ósim qandaı bolady

NUR-SULTAN. QazAqparat – Ońtústik oblystarda ylǵaldyń kúzdik dándi daqyldardyń ónimdiligine teris áser etti. Bul týraly Úkimet otyrysynda Aýyl sharýashylyǵy mınıstriniń mindetin atqarýshy Erbol Qarashókeev aıtty, dep habarlaıdy QazAqparat.

«Bıyldyń qańtar-shilde aılarynda jalpy aýyl sharýashylyǵy óniminiń kólemi 2,4%-ǵa ulǵaıyp, 1 trln 997,3 mlrd teńgeni qurady. Bul ósim negizinen mal sharýashylyǵyndaǵy óndiris kóleminiń 3,4%-ǵa ulǵaıýy esebinen qamtamasyz etildi. Bul rette ósimdik sharýashylyǵy ónimderi 296,6 mlrd teńgege óndirildi, bul naqty mánde ótken jyldyń tıisti kezeńi deńgeıinen 3,1%-ǵa az. Belgili bolǵandaı, bıyl birqatar óńirlerde jaýyn-shashynnyń bolmaýy, joǵary atmosferalyq temperatýramen qatar júrdi, sondaı-aq ońtústik oblystarda sý azdyǵy protsesi saqtalýda. Bul mán-jaılar kúzdik dándi daqyldardyń ónimdiligine teris áser etti», - dedi E. Qarashókeev.

Onyń aıtýynsha, oblystar ákimdikteriniń jedel derekteri aıasynda bıylǵy 1 tamyzdaǵy jaǵdaı boıynsha dándi daqyldardyń ortasha ónimdiligi gektaryna 12,3 tsentnerdi qurady, bul ótken jyldyń osy kezeńindegi túsimdilikten 35%-ǵa az.

«Oblystar bólinisinde jalpy aýyl sharýashylyǵy ónimderiniń respýblıkalyq deńgeıden joǵary ósý qarqyny 6 oblysta: Aqmola (111,8%), Jambyl (104,2%), Pavlodar (103,9%), Shyǵys Qazaqstan jáne Qaraǵandy (103%), Qostanaı (102,7%) oblystarynda baıqaldy», - dedi ol.