Bıyl Atyraý oblysyna maýsymdyq jumystarǵa 800 sheteldik kelýi múmkin

ATYRAÝ. QazAqparat – Bıyl Atyraý oblysyna maýsymdyq jumystarǵa adam kúshi jetispeıdi. Sol sebepten aldaǵy kóktemde 800 sheteldik kelýi múmkin, dep habarlaıdy QazAqparat tilshisi.

Jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Meırambek Aldııarovtyń málimetinshe, bıyl sheteldik jumys kúshiniń maýsymdyq qyzmeti úshin 800 kvota bólingen.

«Bizdiń negizgi maqsatymyz – sheteldik jumys kúshin azaıtyp, jergilikti adamdardy jumyspen qamtý. Alaıda, Atyraý oblysyndaǵy sharýagerlerdiń usynysyn eskerip, bıyl maýsymdyq jumystarǵa jumys kúshin tartýǵa bólingen kvota sanyn 800-ge kóbeıtip otyrmyz. Bul kórsetkish ótken jylmen salystyrǵanda eki esege kóbeıdi», -dep habarlady Meırambek Aldııarov.

Onyń aıtýynsha, aýyl sharýashylyǵy salasyndaǵy maýsymdyq jumystarǵa sheteldik jumys kúshin tartýdyń óz tártibi bar.

Sol sebepten, sharýagerler jumys kúshin tartýdy E-lıtsenzııalaý veb-portaly arqyly júrgizýi qajet.

Budan buryn Ózbekstan Respýblıkasynyń Aqtaý qalasyndaǵy bas konsýly Atabek Tursynbekov kórshi el azamattary Atyraý oblysyna kelip, jumys isteýge daıyn ekenin aıtqan edi.

«Alaıda, Atyraýdaǵy sharýa qojalyqtary arnaıy qujatqa sáıkes, Ózbekstan Respýblıkasynyń Syrtqy eńbek kóshi-qon agenttigimen kelisimshart jasaýy qajet. Bul onlaın formatta da júzege asyrylady. Suranysta qansha adam, qansha aıǵa qajettigi, jalaqy kólemi týraly naqty málimetter kórsetilýi tıis», -dep habarlaǵan edi Atabek Tursynbekov.

Sharýagerlerdiń aıtýyna qaraǵanda, maýsymdyq jumystarmen aınalysatyn sheteldikter kóbinese Ózbekstan Respýblıkasynan keledi. Atyraý oblysynda aýyl sharýashylyǵy salasyndaǵy maýsymdyq jumystar aqpan aıynyń 15-de bastalyp, 15 qarashadaǵa deıin sozylady., jylyjaı qyzmetteri jyl boıy júrgiziledi.

Eske sala ketelik, buǵan deıin Atyraý oblysynda sheteldik jumys kúshin tartýǵa beriletin kvota azaıǵanyn habarlaǵan bolatynbyz.