Bıyl Atyraý kóshelerine 5 myńnan astam jas kóshet otyrǵyzylady

ATYRAÝ. QazAqparat - Memlekettik-jekemenshik áriptestik sheńberinde Atyraý qalasyn kógaldandyrý jumystary bastaldy, dep habarlaıdy Atyraý oblysynyń óńirlik kommýnıkatsııalar qyzmeti.

Naýryz aıynda memlekettik-jekemenshik áriptestik aıasynda «Atyraý qalasyn kógaldandyrý» jobasy boıynsha 5 jylǵa josparlanǵan jumystar bastaldy. Naqtyraq aıtqanda, atalǵan joba sheńberinde, jyl saıyn qalanyń ortalyq kóshelerindegi saıabaq pen alańdarda ósip turǵan 53 myń dana jasyl jelekti kútip ustaý, 12 myń sharshy metrge gúl egý jáne jyl saıyn 5154 jas kóshet otyrǵyzý jumystary júrgiziledi. Sonymen qatar, atalǵan jasyl jelek zıankesterden qorǵalady.

Budan bólek, karantın rejımi aıaqtalǵan soń qala ákimdiginiń qoldaýymen 20 myń dana jas kóshet satyp alynyp, aýyldyq okrýgterde otyrǵyzý kózdelip otyr. Sondaı-aq, bıyl 23 myń sharshy metrge deıin jasyl-kógal tóseledi. Búignde, qalalyq turǵyn úı-kommýnaldyq sharýashylyǵy bólimi tarapynan ashyq konkýrs jarııalanyp, merdiger mekeme anyqtaldy.

«Olar qazirgi ýaqytta jer óńdeý jumystaryn bastap ketti. Al, negizgi jumystar mamyr aıynda bastalady. Aıta keteıik, kógal tóseý jumystary ótken jyly bastalǵan bolatyn. Qalanyń qaıta jańǵyrǵan ortalyq kóshelerin kórkeıtý úshin bul jumystardy jalǵastyrýdy jón kórdik. Bıyl kógal oblys jáne qala ákimdiginiń aýmaǵyna, Azattyq dańǵylynyń Abaı kóshesinen Áýezov kóshesine deıin jáne Vladımırskıı men Qurmanǵazy kósheleriniń aralyǵyna egiledi», - deıdi bólim mamandary.