Bıyl astyqtyń túsimi ortasha jyldyq kórsetkishten joǵary bolýy kerek – Úkimet basshysy

NUR-SULTAN. QazAqparat – Bıyl astyqtyń túsimi ortasha jyldyq kórsetkishten joǵary bolýy kerek. Bul týraly QR Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Úkimet qarjylaı jáne materıaldyq-tehnıkalyq qamtamasyz etý boıynsha barlyq qajetti sharalardy qabyldady. Endi tek jumys isteý ǵana qalyp tur. Bıylǵy jyly boljam boıynsha astyqtyń túsimi ortasha jyldyq kórsetkishten joǵary bolýy kerek», - dedi Álıhan Smaıylov Úkimet otyrysynda.

Osyǵan baılanysty Úkimet basshysy Aýyl sharýashylyǵy mınıstrligi men ákimdikterdiń basty mindeti – egin oraǵyn ýaqytynda jáne sapaly ótkizý ekendigin basa aıtty.

«Elevatorlardyń astyqty qabyldaýǵa jáne saqtaýǵa daıyn bolýyn qamtamasyz etý mańyzdy. Sonymen qatar Aýyl sharýashylyǵy, Indýstrııa mınıstrlikteri men «Qazaqstan temir joly» ulttyq kompanııasy óńir ákimdikterimen birlesip, vagondarmen qamtamasyz etý jáne logıstıka máselesin sheshý jumystaryn júrgizsin», - dedi Úkimet basshysy.

Álıhan Smaıylovtyń atap ótýinshe, Aýyl sharýashylyǵy mınıstrligi Azyq-túlik kelisimshart korporatsııasymen birlesip, qys mezgilinde fermerlerdiń qajettiligin qamtamasyz etý úshin jem-shóp qoryn ýaqtyly jasaqtaý sharalaryn qabyldaýy qajet ári olardyń baǵasy turaqty bolýy tıis.