Bıyl astyq eksporty dástúrli naryqtarǵa baǵyttalady - Aıdarbek Saparov

NUR-SULTAN. QazAqparat – Bıylǵy astyq ónimdiligi byltyrǵy deńgeıde bolýy múmkin. Bul týraly QR Aýyl sharýashylyǵy birinshi vıtse-mınıstri Aıdarbek Saparov málim etti, dep habarlaıdy QazAqparat tilshisi.

«Astyq ónimdiligi boıynsha aıtý ázirge erterek dep oılaımyn, sebebi kóktemgi egis naýqany endi ǵana aıaqtalyp jatyr. Bul naýqandy ońtaıly merzimde aıaqtaǵanymyz qýantarlyq jaǵdaı dep esepteımin. Budan keıin alqaptarda tıisti óńdeý jumystaryn júrgizýimiz kerek. Sondyqtan tıisti málimetterdi shamamen 20 shildeden keıin aıta alamyz. Sol kezde daqyldar maqsaqtanǵan kezde astyq shyǵymdylyǵy baǵalanady», - dedi A. Saparov Ortalyq kommýnıkatsııalar qyzmetinde.

Onyń aıtýynsha, jaýyn-shashyn qalypty normada bolsa, astyq ónimdiligi byltyrǵydan kem túspeýi múmkin. Astyq eksportyna toqtalsaq, jyl saıyn 7-8 mln tonna bıdaı eksporttap kelemiz.

«Sondyqtan 2021 jyly da osy deńgeıde bolamyz dep oılaımyn. Bizde dástúrli burynǵy naryqtar qalyp otyr. ıAǵnı Ózbekstan, Tájikstan, Túrikmenstan, Qyrǵyzstan, Ázerbaıjan, Iran, Aýǵanstan elderi bar», - dedi birinshi vıtse-mınıstr.

Aıta keteıik, 2020 jyly kúrdeli ahýalǵa qaramastan elimiz boıynsha 20,8 mln tonna kóleminde astyq jınalǵan jáne onyń sapasy 2019 jylǵa qaraǵanda áldeqaıda joǵary boldy.

Budan buryn habarlanǵandaı, oblys ákimdikteriniń derekteri boıynsha bıylǵy egis naýqanyn 3 maýsymǵa deıin aıaqtaý josparlanyp otyr.

Sharýalar tuqymdyq materıalmen tolyq qamtylǵan. Tekserilgen tuqymdardyń 90 paıyzy birinshi, ekinshi egistik standartyna saı keledi.