Bıyl astanalyqtardy tegin dárimen qamtamasyz etýge 19,54 mlrd teńge qajet

ASTANA. QazAqparat – Áleýmettik medıtsınalyq saqtandyrý qory Astana qalalyq fılıalynyń dırektory Nurlybek Qabdyqaparovtyń aıtýynsha, bıyl astanalyqtardy tegin dárimen qamtamasyz etýge 19,54 mlrd teńgege ótinim túsken, dep habarlaıdy QazAqparat tilshisi.

«2023 jylǵa tegin medıtsınalyq kómektiń kepildi kólemi aıasynda jáne mindetti áleýmettik medıtsınalyq saqtandyrý júıesinde ambýlatorııalyq dári-dármekpen qamtamasyz etýge berilgen ótinim 19,54 mlrd teńge boldy. Onyń ishinde TMKKK aıasynda – 11,36 mlrd teńge, MÁMS boıynsha eresekterge – 7,23 mlrd teńge, balalarǵa – 1,01 mlrd teńge qajettigi týraly ótinim berildi.

Qańtar aıynan bastap dárilik zattar men medıtsınalyq maqsattaǵy buıymdar bekitilgen kestege sáıkes jetkizilip jatyr, olardyń quny 5,64 mlrd teńge boldy», - dedi ol vedomstvoda ótken brıfıngide.

Sondaı-aq, Nurlybek Qabdyqaparov qordyń sarapshylary medıtsınalyq qyzmettiń sapasynyń jaqsartý úshin patsıent quqyǵyn saqtaý baǵytynda turaqty jumys istep kele jatqanyn aıtty.

«Esterińizge salamyz, qajet bolǵan jaǵdaıda, patsıentter tegin dári-dármekke qatysty málimetti «SK-Farmatsııa» JShS-niń 1439 baılanys ortalyǵy arqyly bile alady, qalalyq jáne mobıldi telefondar arqyly da tegin habarlasýǵa bolady», - dedi fılıal dırektory.