Bıyl astanada problemaly 57 turǵyn úıdiń qurylysy aıaqtalady

NUR-SULTAN. QazAqparat – Nur-Sultan qalasynyń ákimi Altaı Kólginov qurylysy 6 jyldan beri aıaqtalmaı kele jatqan «Sadovye kvartaly» jáne «Komsomolskıı» turǵyn úı keshenderi qashan paıdalanýǵa beriletinin aıtty, dep habarlaıdy QazAqparat.

«Uzaqqa sozylǵan nysandardyń qurylysyn aıaqtaý úshin júıeli jumys júrgizip jatyrmyz. Tańerteńgilik aralaý barysynda 2015 jyly problemalyq dep tanylǵan «Sadovye kvartaly» turǵyn úı keshenine bardym. Úleskerlerdiń sany — 500-den astam otbasy. Qazirgi ýaqytta nysanda qurylys-montajdaý jumystary júrgizilýde. Nysandy kelesi jyly paıdalanýǵa berýdi josparlap otyrmyz.
«Komsomolskıı» turǵyn úı kesheni de 2015 jyly problemalyq nysandardyń qataryna qosyldy. Mundaǵy úleskerlerdiń sany 600 otbasydan asady. Nysanda qurylys-montajdaý jumystary júrip jatyr. Lıft jabdyqtaryn montajdaý, ishki árleý jumystary, ishki ınjenerlik jelilerdi ornatý, qasbettik jumystar, terezeler men vıtrajdardy montajdaý jumystary júrýde. Turǵyn úı kesheniniń qurylysy aıaqtalýǵa jaqyn. Bıyl qurylys jumystaryn aıaqtaýdy josparlap otyrmyz», - dep jazdy qala basshysy Instagram-da.
A.Kólginovtiń aıtýynsha, atalǵan problemalyq nysandardyń qurylysyn «Elorda qurylys kompanııasy» JShS salyp jatyr.

«Júrgizilip jatqan jumystardyń sapasyna erekshe nazar aýdara otyryp, qurylys qarqynyn arttyrýdy tapsyrdym. Sondaı-aq, abattandyrýmen ýaqytyly aınalysý mindeti qoıyldy», - dep jazdy ákim.

Málim bolǵandaı, 2018 jyldyń basynda astanada problemalyq 150 úı men 15 myńǵa jýyq úlesker bolǵan. 2019 jyly 10 nysanda 13 úı aıaqtalyp, 2,5 myń otbasy kópten kútken páterin aldy. 2020 jyly 14 nysan boıynsha 20 úıdiń jumysy aıaqtalyp, 2,7 myń úleskerdiń problemasy sheshildi. Bıyl 57 kóppáterli turǵyn úı keshenin aıaqtaý josparlanǵan, 7 myńnan astam adam baspanaǵa qol jetkizedi.

Jalpy, 2021 jyldyń birinshi jartyjyldyǵynda 21 problemalyq nysannyń qurylysy aıaqtaldy.