Bıyl Astanada bir mıllıon jasyl jelek otyrǵyzylady

ASTANA. QazAqparat – Astana ákimi Jeńis Qasymbek qaladaǵy jańa turǵyn úı keshenderiniń aýmaǵyn abattandyrý jumysy týraly baıandady, dep habarlaıdy QazAqparat.

Ákimniń aıtýynsha, bıyl jospar boıynsha qoldanysqa beriletin turǵyn úı keshenderiniń aýmaǵyn kógaldandyrý jospary qaıta qaralǵan. Jeke qurylys salýshylardyń moınyna jasyl jelekter sanyn kóbeıtý mindeti júkteldi.
«Birinshi kezeń boıynsha 100-den astam turǵyn úı keshenin qamtımyz. Bul jasyl jelekter sanyn 2,5 esege arttyrýǵa múmkindik beredi. Osylaısha, qurylys salýshylar TK aýmaǵynda 100 myńnan astam jasyl jelek otyrǵyzatyn bolady. Qurylys salýshylardyń aldynda úılerdi sapaly kúıde salyp qana qoımaı, turǵyn úı keshenderiniń aýmaǵyn abattandyrýmen, kógaldandyrýmen de aınalysý mindeti tur», - dep jazdy Jeńis Qasymbek Instagram paraqshasynda.
Onyń aıtýynsha, jalpy, bıyl qalada bir mıllıon jasyl jelek (aǵashtar, butalar, kóshetter jáne t.b.) otyrǵyzý josparlanǵan. Onyń 500 myńy – qalanyń jasyl beldeýi aýmaǵynda.
«Biz bul deńgeıdi aldaǵy jyldary da saqtaımyz. Bul Astanany baqsha qalasyna aınaldyrýǵa múmkindik beredi. Al basymdyq japyraqty aǵashtarǵa beriledi», - dedi ákim.