Bıyl áskerı jıyndarǵa 1500 adam shaqyrylmaq

NUR-SULTAN. QazAqparat – «Ashyq NQA» portalyna QR Qorǵanys mınıstrliginiń «2022 jyly áskerı mindettilerdi áskerı jıyndarǵa shaqyrý týraly» buıryqtyń jobasyn jarııalandy, dep habarlaıdy QazAqparat tilshisi.

«2022 jyly 1 500 áskerı mindetti áskerı jıyndarǵa shaqyrylsyn», - dep jazylǵan buıryq jobasynda.

Bul buıryq alǵashqy resmı jarııalanǵan kúninen keıin kúntizbelik on kún ótken soń qoldanysqa engizilmek.

Qazaqstanda áskerı jıyndar áskerı oqytylǵan rezervtiń quramyn tolyqtyrý jáne Qazaqstannyń Qarýly Kúshteriniń, basqa da áskerleri men áskerı quralymdarynyń jaýyngerlik jáne jumyldyrý ázirligin arttyrý maqsatymen turaqty negizde ótkiziledi.

Jıyndarǵa zapasta turǵan jáne densaýlyq jaǵdaıy boıynsha jaramdy áskerı mindettilerdi uzaqtyǵy bir aıdan aspaýǵa tıis oqý jıyndarynan ótýge shaqyrady.

Áskerı jıyndar ýaqytynda áskerı mindettilerdiń jumys orny men atqaratyn laýazymy áskerı bólimge deıin jáne keri qaraı jol júrý ýaqytyn qosa alǵanda saqtalady jáne respýblıkalyq bıýdjet esebinen ortasha jalaqy tólenedi.

Sonymen qatar áskerı jıyndardan jaltarǵany, sondaı-aq áskerı jıyndardan ótý kezinde áskerı qyzmet atqarýdyń belgilengen tártibine qarsy quqyq buzýshylyqtar jasaǵany úshin 5 AEK (shamamen 15 900 teńge) mólsherinde ákimshilik aıyppul túrinde ákimshilik jaýapkershilik kózdelgen.

Buǵan deıin QR Qorǵanys mınıstrligi Nur-Sultan qalasynda Jeńis kúnine arnalǵan áskerı parad uıymdastyrylmaıtyny málim etken edi.