Bıyl «Ańsaǵan sábı» baǵdarlamasy boıynsha 3 myńnan astam áıel EKU jasatty

NUR-SULTAN. QazAqparat – Densaýlyq saqtaý mınıstrligi «Ańsaǵan sábı» baǵdarlamasy aıasynda júzege asyrylǵan ekstrakorporaldy uryqtandyrý protsedýralary týraly málim etti, dep habarlaıdy QazAqparat tilshisi.

«Bıylǵy 6 aı qorytyndysy boıynsha «Ańsaǵan sábı» baǵdarlamasy aıasynda 4 900 patsıent EKU ortalyqtaryna ekstrakorporaldy uryqtandyrýǵa jiberildi (70%), onyń ishinde 3 317 (47%) áıelge EKU qyzmeti júrgizildi», - dep jaýap berdi redaktsııanyń suraǵyna Densaýlyq saqtaý mınıstrligi.

2021 jyly «Ańsaǵan sábı» baǵdarlamasy aıasynda 7 000 patsıentke EKU (100%) júrgizildi, esepke 3 218 júkti áıel (46%) turdy, onyń ishinde 2 212 bala (32%) dúnıege keldi.

Aıta ketsek, táýelsizdik alǵaly 28 myńnan astam qazaqstandyq EKU baǵdarlamalary boıynsha dúnıege kelgen.