Bıyl «Ańsaǵan sábı» baǵdarlamasy aıasynda 7 myń otbasy balaly bolady

ASTANA. QazAqparat – Bıyl «Ańsaǵan sábı» baǵdarlamasy boıynsha EKU aıasynda 7 myń kvota bólindi. Bul týraly QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Ańsaǵan sábı» baǵdarlamasy boıynsha EKU aıasynda bólingen kvota sany 7000-ǵa deıin kóbeıdi. Osy oraıda elimizde 20-dan astam tıisti ortalyq bar. Sondyqtan standartqa sáıkes dárigerleri bar, qural-jabdyqtary jasaqtalǵan ortalyqtar baǵdarlamaǵy júzege asyrýǵa qatysyp otyr. Bıylǵa da 7 myń kvota bólindi», - dedi A. Ǵınııat Senattyń jalpy otyrysynan keıin tilshiler suraǵyna jaýap bere otyryp.

Aıta keteıik, bul emshara terapııalyq jolmen emdeý nátıje bermeıtin bedeýlik dıagnozy qoıylǵan patsıentterge arnalǵan.

EKU-ǵa otbasylyq juptar da, jeke adam da qatysa alady. Mindetti túrde úmitkerdiń erikti jazbasha kelisimi bolýy kerek.

Sondaı-aq, Qazaqstan azamaty bolýy jáne Densaýlyq saqtaý mınıstrligi belgilegen medıtsınalyq parametrlerge (reprodýktıvti jas – 18-den 42 jasqa deıin, qalypty somatıkalyq jáne endokrındik mártebe, joǵary follıkýlıarlyq rezerv) sáıkes kelýi qajet.

Budan buryn habarlanǵandaı, 2020 jyly Prezıdent «Ańsaǵan sábı» arnaýly baǵdarlamasyn iske qosýdy tapsyrdy.

2022 jyldyń aıaǵynda «Ańsaǵan sábı» baǵdarlamasy aıasynda 6,5 myń áıelge kómek kórsetilgeni habarlandy.

Nátıjesinde, 2650 otbasynda 3110 sábı dúnıe esigin ashty.