Bıyl Almatyda stýdentterge arnalǵan eki jataqhana salynady

ALMATY. QazAqparat – Almaty qalasynyń ákimi Baqytjan Saǵyntaev Eýrazııalyq zań akademııasynyń kópsalaly kesheninde boldy, dep habarlaıdy QazAqparat tilshisi.

Megapolıs ákimi Instagram-daǵy paraqshasynda qaladaǵy joǵary oqý oryndarynyń stýdent jastardyń ómir súrý jaǵdaılaryn jaqsartý úshin jataqhanalar salyp jatqanyn aıtty. Bul – Elbasynyń «Bes áleýmettik bastamasyndaǵy» negizgi mindettiń biri.

«Dinmuhamed Qonaev atyndaǵy Eýrazııalyq zań akademııasynda ashylǵaly jatqan kópsalaly keshende boldym. 100 stýdentke arnalǵan oryn, oqytýshylarǵa arnalǵan bólmeler, sondaı-aq turmysqa qajet ashana, kir jýatyn oryn, kitaphana, medpýnkt, ınternet synyptar qarastyrylǵan», - dep jazdy B. Saǵyntaev.

Sońǵy eki jylda joǵary oqý oryndary 1,5 myń orynǵa jýyq 5 jataqhana saldy jáne modernızatsııalandy. Bıyl 1,7 myń stýdentke arnalǵan taǵy eki ǵımarattyń qurylysy bastaldy.

«Almaty – jastar qalasy. Sondyqtan bilim alyp júrgen jastardyń ómir súrý men turmys jaǵdaıyn jaqsartý boıynsha jumystardy jalǵastyra beremiz», - dep atap ótti Almaty ákimi.