Bıyl Almatyda 1 synypqa 2 myń oqýshy jospardaǵydan artyq keldi – máslıhat depýtaty

ALMATY. QazAqparat - Almaty balabaqshalarynda tárbıeshiler 100-120 myń teńge kóleminde aılyq alady. Bul óte az. Osyǵan oraı, Prezıdent Joldaýynda balabaqshala tárbıeshileriniń jalaqysyn kóterý týraly aıtqany olardyń jumysyna úlken serpin bermek. Bul týraly Almaty qalasy máslıhatynyń depýtaty Araılym Shamova aıtty, dep habarlaıdy QazAqparat tilshisi.

«Búgin Prezıdent Qasym-Jomart Toqaev «Ádiletti memleket. Birtutas Ult. Berekeli qoǵam» atty Joldaýynda bes baǵdardy atap ótti. Ózim bilim salasynyń mamany bolǵan soń, áýeli bilim salasyna toqtalmaqpyn. Prezıdent Joldaýda balabaqsha tárbıeshilerininiń jalaqysyn kóterý týraly aıtty. Rasynda, qazirgi tańda balabaqsha tárbıeshileriniń eńbekaqylary tómen. Almatyda tárbıeshiler 100-120 myń teńge kóleminde jalaqy alyp júr. Prezıdenttiń bastamasy olardyń jumystaryna úlken serpin beredi dep aıta alamyn», - dedi spıker.

Sondaı-aq ol Almaty mektepterinde oqýshynyń oryn tapshylyǵyn atap ótti.

«Bıyl Almatyda 1 synypqa jospardan bólek, 2 myń bala artyq keldi. Eger Prezıdent Joldaýynda aıtqandaı, «Jaıly mektep» jobasy aıasynda 2025 jylǵa deıin 800 myń balaǵa arnalǵan mektep salynar bolsa, bul máseleniń sheshimi tabylady dep oılaımyn. Sonymen birge, qazir «jańadan ashylatyn osy mektepter qaı tilde oqytady» degen suraqtar qoıylýda. Oǵan Memleket basshysy naqty jaýap berdi, ıaǵnı, «suranys qaı tldie bolsa, mektep sol tilde ashylady», - dedi depýtat.

Araılym Shamova 18 jasqa deıingi balalarǵa áleýmettik shottyń ashylýyn Joldaýdaǵy óte quptarlyq jaǵdaı ekenin atap ótti.

«Bul jerde Ulttyq qordyń ınvestıtsııalyq tabysynan aqsha túsip otyrady jáne bul aqshany bala 18 jasqa tolmaı shottan sheship ala almaıdy. Bala 18 jasqa tolǵannan soń, shotyndaǵy qarajat óziniń oqýyna nemese úı alýyna úlken kómek bolmaq», - dedi spıker.