Bıyl Almaty oblysynda 40 áleýmettik nysan jóndeledi - JQJK-2020

ASTANA. QazAqparat - 2016 jyly Almaty oblysynda «Jumyspen qamtýdyń 2020 jol kartasy» baǵdarlamasynyń jumyspen qamtýdy, ınfraqurylymdy jáne turmystyq-kommýnaldyq sharýashylyqty damytý arqyly qarastyratyn birinshi baǵytyn iske asyrýǵa respýblıkalyq bıýdjetten 4,8 mlrd teńge bólindi. Osy qarajat esebinen 40 ınfraqurylymdyq nysandy iske asyrý josparlanýda, onyń 33-de kúrdeli jóndeý, 7-de aǵymdaǵy jóndeý jumystary júrgiziledi, dep habarlaıdy pm.kz.

QR DSÁDM habarlaǵandaı, jóndeletin ǵımarattardyń 15 - bilim berý, 4 - densaýlyq saqtaý, 1 - dene shynyqtyrý, 5 - kommýnaldyq-ınjenerlik, 4 - transporttyq, 10 - abattandyrý, 1 - mádenıet nysany bolyp tabylady.

Infraqurylymdyq jobalardyń iske asyrylýy 1 myń 843 jumys ornyn qurýǵa múmkindik beredi, onyń ishinde 942 adam jumyspen qamtý ortalyqtary arqyly ornalastyrylady.

Búgingi kúni 33 jobanyń iske asyrylýy bastaldy, onyń sheńberinde 811 adam jumysqa turdy, olardyń ishindegi 488 adam - «JQJK 2020» baǵdarlamasyna qatysýshylar.

Eske salsaq, 2015 jyly «JQJK 2020» baǵdarlamasynyń birinshi baǵytyn iske asyrýǵa 13,7 mlrd teńge bólingenin, jalpy respýblıka boıynsha 588 ınfraqurylymdyq jobalar júzege asyrylyp, 8,6 myń adam jumysqa ornalastyrylǵanyn esterińizge salamyz. 2016 jyly «JQJK 2020» baǵdarlamasynyń birinshi baǵytyn iske asyrýǵa 80,1 mlrd teńge bólindi. Bul qarajat jobalardyń sany eskerile otyryp, jergilikti atqarýshy organdardyń tapsyrystary negizinde óńirler arasynda bólinedi.