Bıyl alǵashqy toqsanda Qazaqstannan Tájikstanǵa eksport kólemi 200 mln dollarǵa jýyqtady
«Elderimiz búginde strategııalyq áriptestik deńgeıine kóterilgen shyn mánindegi dostyq qarym-qatynas ornatty. Tájikstan Prezıdenti Emomalı Rahmonnyń Qazaqstanǵa memlekettik sapary qarsańynda biz búgingi is-sharany baýyrlas Tájikstanmen ekijaqty saýda-ekonomıkalyq yntymaqtastyqty kúsheıtý jónindegi birlesken nıetimizdi taǵy da rastaı otyryp ótkizemiz. Biz Tájikstanmen keń aýqymdy baǵyttar boıynsha odan ári jumys isteýge nıettimiz. Tájikstan óńirdegi negizgi seriktesterdiń biri sanalady jáne saýda-sattyq jyl saıyn oń dınamıkany kórsetip otyr», - dedi vıtse-premer.
Máselen, onyń dereginshe, eki eldiń arasyndaǵy saýda-sattyq ótken jyly 18,5 paıyzǵa ósip,1,4 mlrd AQSh dollaryna jetti. Qazaqstan eksporty 9,7 paıyzǵa artyp, 877 mln AQSh dollary kóleminde boldy. Atap aıtqanda, astyq eksporty 29 paıyzǵa, margarın 7,6 ese, kúnbaǵys maıy 42 paıyzǵa, arpa 2,3 ese artty. Tájikstannan da ımport kólemi 38 paıyzǵa jýyq ulǵaıyp, 500 mln dollarǵa jetti. Qazaqstan Tájikstannan mys kontsentrattaryn, keptirilgen jemis, jańǵaq, mıneraldy jáne gazdalǵan sý, kókónis pen jemis-jıdek satyp alady.
«Sondaı-aq, bıyl osy úrdistiń jalǵasyn kórip otyrǵanymyzdy qýanyshpen atap ótken jón. Máselen, Qazaqstannan Tájikstanǵa eksport birinshi toqsanda 22 paıyzǵa ósip, 200 mln dollarǵa jýyqtady. Osylaısha, el basshylarynyń memleketter arasyndaǵy taýar aınalymyn 1 mlrd-qa deıin jetkizý jónindegi alǵa qoıǵan mindeti sátti oryndalǵanyn atap ótkim keledi. Alaıda, biz munymen toqtap qalmaýymyz kerek jáne nátıjemizdi eki ese arttyrý úshin ilgerileýimiz qajet», - dedi Serik Jumanǵarın.