Bıyl alǵash ret onkologııalyq naýqastar medsaqtandyrý esebinen ońaltýǵa jiberiledi

NUR-SULTAN. QazAqparat – Bıyl onkologııalyq naýqastar alǵash ret Mindetti áleýmettik medıtsınalyq saqtandyrý qarajaty esebinen ońaltýǵa jiberiledi. QR Densaýlyq saqtaý mınıstri Ajar Ǵınııat vedomstvonyń keńeıtilgen alqa otyrysnyda osyndaı málimet aıtty, dep habarlaıdy QazAqparat tilshisi.

«Byltyr Ortalyq Azııa elderindegi alǵash ret ortalyq júıke júıesi aýrýlaryn emdeıtin radıohırýrgııalyq gamma ortalyǵyn ashtyq. Bir jylda 263 ota jasaldy. Semeıdegi ıadrolyq medıtsına ortalyǵy jumysyn bastady. Ótken jyly qaterli isikterdi emdeý úshin 15 patsıentke dıagnostıka júrgizildi. Osylaısha buryn mundaı emdi shetelden alyp kelgen patsıentter el ishinde emdelýge múmkindik aldy», - dedi vedomstvo basshysy.

Onyń aıtýynsha, mamandandyrylǵan medıtsınalyq kómekti jetildirý sheńberinde júrek-qan tamyrlary aýrýlarynan bolatyn ólim-jitimdi azaıtý úshin jedel jáne pallıatıvtik kómektiń halyqaralyq standarttaryna kezeń-kezeńimen kóshý josparlanýda.

«Joǵary tehnologııalyq medıtsınalyq qyzmetter kólemin 30% ulǵaıtýǵa qarajat bólindi. Onkologııalyq kómekti jetildirý sheńberinde tomoterapııa, sáýlelik terapııa, radıatsııalyq ıod terapııasy sııaqty joǵary tehnologııalyq qyzmetterdiń kólemi ulǵaıtylady. Sondaı-aq, bıyldan bastap MÁMS qarajaty esebinen alǵash ret onkologııalyq naýqastarǵa medıtsınalyq ońaltý qyzmeti kórsetiletin bolady. Semeı, Nur-Sultan, Almaty jáne Shymkentte memleket-jeke menshik áriptestigi aıasynda 4 pozıtrondy emıssııalyq tomografııa ortalyǵyn ashý josparlanýda», - dedi Ajar Ǵınııat.