Bıyl áleýmettik baspana kezeginde astanalyqtarǵa 6 myńdaı páter beriledi

ASTANA. QazAqparat – Astana qalasynyń ákimi Jeńis Qasymbek Esil aýdany turǵyndarymen kezdesýinde bıyl áleýmettik baspana kezeginde astanalyqtarǵa 6 myńdaı páter beriletinin málim etti, dep habarlaıdy Qazaqparat tilshisi.

«Men jaldamaly páterde júrgen kópbalaly anamyn. Arendalyq baspana qashan beriletinin bilgim keledi. 2021 jyly bıýdjetten 259 páterge aqsha bólingen. Sol áli berilgen joq. Áleýmettik kezektegi nómirim – 1660», - dedi qala turǵyny.

Qala ákimi birinshi kezekte burnaǵy jyldardan beri kezegi kelmeı júrgen azamattar páter kiltin alatynyn aıtty.

«Bıyl 500 páter kópbalaly otbasyna beriledi. Siz aıtyp otyrǵan 259 páterge qosymsha 500 páter beriledi degen sóz. Jalpy qala boıynsha áleýmettik kezekte turǵan azamattarǵa 6 myńdaı páter beriledi.

Siz surap otyrǵan alǵashqy 200 páter mamyr aıynyń aıaǵyna deıin beriledi», - dedi qala ákimi.