Bıyl Alakólge poıyzben 180 myńnan astam jolaýshy bardy
«QTJ» UK» AQ-da Alakól kýrorttyq aımaǵy baǵytynda jolaýshylar tasymaly jazǵy maýsymynyń qorytyndysy shyǵarylyp, kelesi jylǵa sapany jaqsartý is-sharalary qaraldy. «QTJ» UK» AQ Basqarma tóraǵasynyń birinshi orynbasary Qanat Álmaǵambetovtyń tóraǵalyǵymen ótken keńeske QR IIDM, Almaty jáne Shyǵys Qazaqstan oblystary ákimdikteriniń, «Atameken» UKP jáne jeke tasymaldaýshylar men týrıstik kompanııalar ókilderi qatysty», - dep atap ótedi ulttyq kompanııadan.
Taratylǵan aqparatqa qaraǵanda, bıyl tanymal baǵyt sanalatyn Alakólge deıin 11 poıyz júrdi (8-i – «Jolaýshylar tasymaly» AQ, 3-eýi – jeke tasymaldaýshylar). Temirjol kóligin 182 myń jolaýshy paıdalandy. Bul 2020 jylmen salystyrǵanda 42 myń adamǵa kóp. Kóliktik qyzmet kórsetý sapasyn arttyrý úshin Jalańashkól, Kóktuma jáne Aqshı stantsııalaryndaǵy jolaýshylar platformalary uzartyldy.
Qanat Álmaǵambetov kompanııada 2022 jyldyń jaz mezgilinde Alakólge deıin jolaýshylardy tasymaldaýdy qamtamasyz etý jónindegi is-sharalar jospary ázirlengenin habarlady. Kelesi jyly osy baǵytta júretin poıyzdar sany saqtalady. Barlyq vagondar aýa baptaý júıesimen jabdyqtalady.
«Sondaı-aq, keńeste elektrondy bıletterdi satý jáne qaıtarý júıesiniń erekshelikteri qaraldy. Týrıstik bıznes ókilderi demalysty aldyn-ala josparlaǵan saıahatshylardyń qajettilikterin qanaǵattandyrý úshin jol júrý bıletterin erterek brondaý merzimderin qaıta qaraýdy surady. Qanat Álmaǵambetov «Jolaýshylar tasymaly» AQ-na týroperatorlar úshin temir jol bıletterin erte brondaý tártibin retteıtin erejelerdi ázirleýdi tapsyrdy», -delingen QTJ aqparatynda.