Bıyl ál-Farabı atyndaǵy Memlekettik syılyqty ıelengen ár jobaǵa 18,6 mln. teńge beriledi (FOTO)
«Ál-Farabı atyndaǵy ǵylym men tehnıka salasyndaǵy Memlekettik syılyq bıyl tuńǵysh ret berilmek. Saraptaý barysynda irgeli ǵylymı zertteýlermen qatar, ýaqyt talabyna sáıkes ınnovatsııanyń eń úzdik úlgilerin basty nazarǵa alatyn bolamyz», - dedi Memlekettik hatshy.
Atap aıtqanda, ál-Farabı atyndaǵy ǵylym men tehnıka salasyndaǵy Memlekettik syılyǵy Elbasy Nursultan Nazarbaevtyń Jarlyǵymen bıylǵy qańtarda taǵaıyndaldy. Ol úzdik ǵylymı zertteýler men engiziletin ınnovatsııalar úshin tapsyrylatyn bolady.
«Erejege sáıkes, eki jylda bir ret 7 Memlekettik syılyq taǵaıyndalady. Bıyl bir syılyqtyń somasy 18,6 mln. teńgeni quraıdy. Atalǵan sharalar ǵalymdar eńbegin jáne olardyń ǵylymǵa qosqan shynaıy úlesin yntalandyrýǵa, ǵylymdy qajetsinetin ekonomıkany damytýǵa baǵyttalǵan», - dedi ol.
G.Ábdiqalyqova óz sózinde Elbasy usynǵan bes ınstıtýtsıonaldyq reforma jáne «100 naqty qadam» Ult josparynyń ár qadamy zamanaýı qazaqstandyq qoǵamnyń irgesi men zııatkerlik áleýeti bolatyn bilim jáne úzdik tehnologııalar tiregin boljaıtynyn atap ótti. Osy oraıda Memlekettik hatshy Ult josparyn iske asyrýda otandyq ǵylymı tehnıka zııalylarynyń qazaqstandyqtardyń ómir súrý sapasyn jaqsartý maqsatynda joǵary tehnologııalyq ekonomıkalyq ósý men adamı kapıtaldy damytýda basty ról atqaratynyn atap ótti.
Belgili bolǵandaı, bıyl Qazaqstan Respýblıkasynyń ál-Farabı atyndaǵy ǵylym men tehnıka salasyndaǵy Memlekettik syılyǵyn taǵaıyndaý boıynsha komıssııanyń qaraýyna 26 jumys usynyldy. Otyrys barysynda ony taǵaıyndaýǵa usynylǵan jumystar boıynsha memlekettik saraptama qorytyndylary men taldaý nátıjeleri qarastyryldy. Komıssııa otyrysynyń qorytyndysy boıynsha syılyqty taǵaıyndaýǵa aldyn ala irikteýden ótken jumystar tizbesin bekitý týraly sheshim qabyldandy.