Bıyl aqyly joldardan 25 mlrd teńge paıda tústi

ASTANA. QazAqparat – 1 qarashada elimizdegi respýblıkalyq mańyzy bar aqyly joldardan 25 mlrd teńge aqsha jınaldy. Bul týraly Indýstrııa jáne ınfraqurylymdyq damý mınıstrligi avtomobıl joldary komıtetiniń tóraǵasy Tólegen Abdýllın málim etti, dep habarlaıdy QazAqparat tilshisi.

«Elimizdegi avtomobıl joldarynyń jalpy uzyndyǵy - 96 myń shaqyrym. Onyń ishinde 25 myń shaqyrym - jol respýblıkalyq mańyzy bar, al 71 myń shaqyrym - oblystyq jáne aýdandyq mańyzy bar jol. Respýblıkalyq mańyzy bar joldar Indýstrııa jáne ınfraqurylymdyq damý mınıstrligi avtomobıl joldary komıtetiniń qaramaǵynda. Memlekettik tapsyrma sheńberinde damytý jáne kútip ustaý jónindegi jumystardy uıymdastyrýdy operator «QazAvtoJol» ulttyq kompanııasy júzege asyrady. Oblystyq jáne aýdandyq mańyzy bar avtojoldardy, sondaı-aq kóshe-jol jelisi jergilikti atqarýshy organdardyń jaýapkershiliginde», - dedi Tólegen Abdýllın ortalyq kommýnıkatsııalar qyzmeti alańynda ótken baspasóz máslıhatynda.

Komıtet basshysynyń aıtýynsha, bıyl qoldanystaǵy 11 myń shaqyrymnan astam avtojolǵa qurylys-montajdaý jumysy júrip jatyr.

«Bıylǵy 1 qarashadaǵy jaǵdaıǵa sáıkes 2200 shaqyrym aqyly joldan shamamen 25 mlrd teńge jınaldy. Jınalǵan soma aldymen jol ýchaskelerin jóndeý men kútip ustaýǵa jumsalady», - deıdi ol.