Bıyl Aqtóbe oblysynda 23 myńnan astam jumys orny qurylady

AQTÓBE. QazAqparat – Aqtóbe oblysy boıynsha bıyl 23 myńnan astam jumys orny qurylady. Bul týraly oblys ákimi Ońdasyn Orazalın qoǵamdyq keńes aldynda bergen esebinde aıtty, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Byltyr Aqtóbe oblysyna 650 mıllıard teńgege jýyq ınvestıtsııa tartyldy. Ótken jylǵy kórsetkishten 6 paıyzǵa artyq.

«Koronavırýs pandemııasy búkil álemdik ekonomıkaǵa keri áserin tıgizbeı qoımady. Biz ekonomıkanyń kúrt tómendeýine jol bermeıtin jáne ári qaraı qalpyna keltiretin sharalar qabyldadyq. Jaǵdaı turaqtandyryldy. Negizgi áleýmettik-ekonomıkalyq kórsetkishter boıynsha oń dınamıka bar. Atap aıtqanda, ónerkásiptik kásiporyn 1,8 trln teńgeniń ónimin óndirip, 646,8 mlrd teńge ınvestıtsııa tartyldy»,- dep atap ótti oblys ákimi O.Orazalın.

Aýyl sharýashylyǵy salasynda óndirilgen ónim kólemi 325 mlrd teńgege jetti.

Sharýalardy qoldaý maqsatynda sýbsıdııanyń birneshe túrine 20,4 mlrd teńge bólindi, 47,8 mlrd teńge jeńildetilgen nesıe berildi.

Al shaǵyn jáne orta bıznes 782,5 mlrd teńgeniń ónimin shyǵardy.

«Bıznestiń jol kartasy – 2025» baǵdarlamasy aıasynda 3,1 mlrd teńge bólinip, 600 ShOB sýbektisi memlekettik qoldaýǵa ıe boldy.

«Eńbek» baǵdarlamasy boıynsha 4,7 mlrd teńgege 953 joba maquldandy.

Ońdasyn Orazalın pandemııanyń densaýlyq saqtaý júıesi úshin kúshti synaq bolǵanyn basa aıtty.

Infektsııamen kúresýge jáne epıdjaǵdaıdyń turaqtylyǵy úshin shamamen 5 mlrd teńge, sonyń ishinde medıtsınalyq tehnıkalar men qural-jabdyqtar satyp alýǵa 3,4 mlrd teńge, dárilik zattardy satyp alýǵa, jeke qorǵanys zattary men ókpeni jasandy jeldetetin apparattardy satyp alýǵa 1,3 mlrd teńge bólindi.

Aqtóbede jol sapasyna qatysty problema ózekti bolyp qala beredi. Byltyr 33,2 mlrd teńgege 606 shaqyrym jol salynyp, jóndeldi.

Bul jaqsy jáne qanaǵattanarlyq jaǵdaıdaǵy joldardyń úlesin 61% deıin ulǵaıtýǵa múmkindik berdi.

Bıyl jol sapasyn jaqsartý jáne kólik júıesin damytý maqsatynda «Aqtóbe – Qandyaǵash» jolynyń qurylysy júrgiziledi.

«Biz jumyssyzdyqtyń ósýine jol bermeı, onyń deńgeıin 4,8% ustaı aldyq. 23 myńnan astam jańa jumys ornyn qurý arqyly da oń nátıjege qol jetti. Onyń 60% turaqty. Osy baǵyttaǵy jumystar «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda da júrgizilip jatyr. 2021 jyly keminde 23 myń jumys ornyn qurý josparlanyp otyr. «Eńbek» baǵdarlamasymen 50 myńnan astam adam qamtylatyn bolady. Bizdiń basty mindetimiz - halyqtyń turmys sapasyn kóterý jáne ál-aýqatyn jaqsartý»,- dedi oblys ákimi.